Tatarstan citäkçelege Gennadiy Zyuganov belän oçraşmadı. Şuşı xaqtağı soraw birelgäç, kommunistlar firqäse räise «Sezneñ citäkçegez çitkä kitkän», dip cawap birde. Ğomumän alğanda, Gennadiy Zyuganov Tatarstan xakimiätlärenä açulı äle. 1996nçı yılgı saylawlarda kommunistlar öçen birelgän tawışlarnı Yelsinğa quşıp cibärde dip, yıllar buyı respublika belän mäxqämäläşep yörde. Gennadiy äfände bu yulı da şul xälne iskä aldı.
Matbuğat oçraşuında ul, şulay uq, Rusiäneñ berençe prezidentın da, xäzergesen dä, anıñ tarafdarların da qatı tänqit utına tottı. Boris Berezovskiyğa da tiskäre bäyä birde, üzeneñ säyäsi köndäşlären dä maqtamadı. Zalda utırğan aq saqallı babaylar häm rayonnan kilgän apalar anıñ här süzen xuplap tordı.Kommunistlar firqäse aldağı saylawlarğa zur ömetlär bağlıy. Alar Tatarstannıñ här saylaw okrugına da üz keşesen täqdim itte. Şuşı nämzätlärneñ kübese yulbaşçıların ozatıp yörde. Gennadiy Zyuganovnıñ uñ yağında Näsimä Stolyarova utırsa, sul yaqta Aleksandr Saliy kürende. Kommunistlar yulbaşçısınıñ kilü maqsatı xaqında firqäneñ Tatarstan bülege wäkile Robert Sadıyqov bolay dip äytte:
« Ul saylawçılar belän ällä ni oçraşmıy, mitinglar ütkärmi. Küräseñ Tatarstannıñ ähämite bik zur, biredäge xällärne üz küze belän kürergä kilde».Robert Sadıyqov äytüençä, kommunistlar Tatarstanda aldağı Duma saylawlarında 1 millionlap tawış cıyarğa ömet itä. Alar belän bergä üzen oppozitsiä dip atawçı «Tügäräk östäl» wäkilläre dä xakimiätlärgä qarşı tawış birüçe saylawçılar öçen köräşep qaramaqçı. Şuşı oçraşuda bulğan «Ömet» xäräkäte wäkile Zöhrä Äysinä Gennadiy Zyuganovqa möräcäğät itep, saylawlarnı küzätep baru eşendä yärdämen soradı. Kommunistlar yulbaşçısı aña yuridik yärdäm wäğdä itte.
Gennadiy Zyuganov Ulyanov-Lenin muzeyında matbuğat wäkilläre belän oçraşqannan soñ, Qazandağı başqa iptäşläre belän küreşergä kitte. Partiä wäkilläre anı şulay uq TASSRnıñ 10 yıllıgı isemendäge Mädäniät yortında kürä aldı.Bikä Timerova, Qazan.
