Accessibility links

пәнҗешәмбе, 8 декабрь 2016, Казан вакыты 21:25

Röstäm Miñnexanov premier kabinetın KamAZ kabinasına alıştırdı


Düşämbedä ictimaği, säyäsi tormış yaña sulış ala. Däwlät Sovetı kiläse yılğa büdjetnı berençe uqılışta qabul itkäç, kerem-çığımnarnı yañadan barlıylar, qayda, nindi yamawlıq salu turında baş watalar. Premier-ministr Röstäm Miñnexanov Berläşkän Ğäräp Ämirleklärenä säfärgä kitte. Ul anda 5 kön buyı KamAZ maşinasında cilderäçäk. İsäbe, bötendönya avtorallienda tağın ber ciñügä ireşü. Qayberäwlär stresstan xämer yäki munça kerep qotılırğa tırışqanın istä totsañ, premiernıñ adrenalin artınnan quuı Tatarstan danın da kütärergä mömkin.

Respublika prezidentı Mintimer Şäymiev yaldan qaytıp töşte. Düşämbe könne ul ağımdağı eşlär belän tanıştı häm kiçen Qazan hawa mäydanına bardı. Ul Rusiäneñ premier-ministrı urınbasarı Vladimir Yakovlevnı, tözeleş ministrı Nikolay Koşmannı qarşıladı. Sişämbe könne Qazanda Rusiäneñ 2010 yılğa qädär tözeleş strategiäsen tikşerügä bağışlanğan kiñäşmä açıla. Anda başqa töbäklärdän kilgän wäkillär dä bulaçaq.

Uzğan yal könnärendä yul tözü tarmağı xezmätkärläre bäyräm itte. Bu bik awır häm zur çığımnar taläp itä torğan tarmaq. Tatarstanda yul tözü eşläre buyınça maxsus ministrlıqlar ğına tügel, şul eşneñ atası bulğan premier-ministr urınbasarı Vladimir Şvetsov eşçänlege küz aldında. Küperlär salına, metro tözelä, yullar tözätelä. Yañaları da bar, cimerekläre, sikältäse, yulsız urınnar tağın da kübräk. 2 yıl elek respublikada yul tözü fondı beterelde. Xäzer yul tözü aqçaları Mäskäwgä cibärelä, ä annan tamçılap, qalaqlap qına birälär. Sikältä, çıqırlar öçen kemne sügärgä dä belmässeñ – ällä üzäk aqça birmi, ällä şähär, rayon, respublika citäkçeläre citkermi. Bigräk tä, Qazanda xällär awır. Meñyıllıqqa kilgän qunaqlar mondıy yullarda isän-imin yöri alırmı. Qısqası, yul tözüçelär bäyräm itkändä üzläreneñ nujaların da iskä alğannardır. Ä şähär xucalığı türäläre çit illärdä säyäxät itügä qarağanda, üz tıqrıqlarında kübräk yörsälär, xalıq öçen zur bäyräm bulır ide.

XS
SM
MD
LG