Çärşämbe könne Kaliningrad delegatsiäseneñ Tatarstanğa eşlekle vizitı tämamlandı. Mäğlüm ki Kaliningrad ölkäse gubernatorı Vladimir Yegorov citäklägän 80 keşelek delegatsiyaseneneñ Tatarstanda bulu programması bik külämle ide. Berençe könne “Qazan yärminkäse” berläşmäsendä Kaliningrad ölkäse şirkätläreneñ tovarları kürgäzmäse açıldı. Anda qırıqlap şirkät häm firmalarnıñ citeştergän tovarların kürsättelär. Annan soñ Kaliningrad qunaqları “Qazan boralaqlar zavodı” berläşmäsendä buldılar. Qazannıñ Ciñü Parkında 2 bötendönya suğışın da häläk bulğannar häykälenä çäçäklär quydılar. “Tuzğan toraq” programması buyınça tözelgän yortlarnı qarap yördelär. Qazan däwlät universitetında, Sälix Säydäşev isemendäge Zur konsert zalında, “Basketxoll” da häm “Kaleydoskop” dip atalğan tözelep yatuçı mädäni-sport kompleksında buldılar. Şulay Tatarstannıñ iqtisadıy mädäni xäle belän tanışqaç, aralaşqaç Ministrlar Kabinetında söyläşülär buldı. Bu söyläşülärdä Auropağa täräzäne Kaliningrad ölkäse Tatarstan belän bergäläşep tişärgä täqdim yasadı. Baltıyk diñgezendä port häm xalıq-ara aeroport tözügä tenderda qatnaşırğa täqdim itte. Tözeläçäk diñgez portı bik zur bulaçaq ikän. Anıñ unike tirän priçalı bulaçaq. Auropağa härtörle tovarlarnı da ozatıp toru öçen mömkinleklär bulaçaq-avtomobillärne dä, yağulıq gazın da, benzin da. Älege tözeleşneñ kiläçäge ömetle, ul maqsatlı Federal' programmağa kertelgän. Kaliningradta diñgez häm hawa portı tözüdä qatnaşu täqdimen Tatarstan xökümäte qabul itte dip äytelä räsmi xäbärlärdä. Kaliningrad ölkäsendä yäşäwçe tatarlarğa da älege vizitnıñ yärdäme tiär inşalla. Qazanda bulğanda Kaliningrad ölkäse gubernatorı Vladimir Yegorov üzlärendä mäçet tözep birergä wäğdä itte. Bötendönya tatar kongressı da Kaliningrad tatarlarınıñ xälenä kerep yärdäm çaraları kürergä kereşte.
Yunıs Ätnäle.
