Accessibility links

дүшәмбе, 5 декабрь 2016, Казан вакыты 13:43

Milli mäğlümat çaralarınıñ töp probleması - saqlanıp qalu


13nçe noyäberdä Bötendönya tatar kongressınıñ başqarma komitetında tatar mäğlümat çaraları xezmätkärläreneñ seminar-kiñäşmäse açıldı. Berniçä säğät däwamında barğan söyläşü kürsätkänçä, Samara, Orenbur, İjaw, Tömän häm Mäskäwdä eşläüçe tatar jurnalistların ber uq problemalar borçıy. Milli mäğlümat çaraları aldında xäzer aqça qıtlığınnan tış, ğomumän saqlanıp qalu mäs’äläse tora. Samara, Sember, Tömän, İjaw da milli mäğlümat çaraları çığış kilä, ä menä Yekaterinburda atnağa ike tapqır çığıp kilgän «Minem ilem» isemle televidenie tapşıruı avgust ayınnan birle yabılğan. Häm anı yañadan torğızu öçen ximayaçılar yärdäme kiräk. Tögäl itep äytkändä ul tapşıru elek tä, kiñ küñelle tatar eşmäkäre yärdäme belän çığıp kilgän. Ämma ay sayın 150 meñ sumnı Yekaterinbur televideniesenä küçerep toru, eşläre uñışlı ğına barğan eşmäkärgä dä awır bulğandır. Tapşırular şulay itep tuqtağan. «Minem ilem» programmasınıñ möxärrire Yuliä Näsretdinova bu cıyılışqa Tatar Kongressınnan berär yärdäm, cılı süz bulmas mikän dip kilgän.

Yuliä Näsretdinova şikelle uq, başqa jurnalistlar da Qazanğa moñ-zarların cıyıp kilgän. Çiläbedä mäsälän radiotapşıruğa atnasına 3 minut qına birelä ikän. Ästerxandağı tatar gäziteneñ çığu yışlığı nıq kimegän, ul xäzer 3 ayğa 1 genä tapqır çığa. Samara häm Orenburdağı gäzitlären çığaru finans qıyınlıqlarğa bäyle. Berdäm mäglümäti tirälekne tudıru öçen «Tatarstan - yaña ğasır» kanalı xezmät itär dip uylanılğan ide. Ämma Ästerxan wäkile fikerençä, bu tele-radio kanalnıñ tapşıruları saylaw aldı çorında özelgän. Bötendönya tatar kongressı wäkile, Başqortstan televidenieseneñ Tatarstan tamaşaçıları telealğıçlarına kilep kergän kebek, «Yaña ğasır» kanalın da Ufa tamaşaçıları iğtibarına täqdim itep bulmıymı dip soradı. «Yaña ğasır»kompaniäse isemennän cawap totqan räis urınbasarı Miläwşä Aytuğanova, bu qıyın dide. Ğomumän «Yaña ğasır» tele-radiokompaniäseneñ eşenä bäyle bik küp sorawlar birelde. Miläwşä xanım ber söyeneçle xäbär dä äytte. 2004nçe yılda bu kanal 4 şähärdä, İjaw, Yekaterinbur, Ufa häm Peterburda xäbärçelär punktların açırğa cıyına ikän. Telekanalnıñ tatarça mul’tfilmnarın da, tapşırular programmasın da buşlaw ğına birüne sorawçılar buldı. Xätta ki Tatar Kongressı sputnik tälinkälären öläşep çıqmas mikän dip, şayarıp sorawçılar yuq tügel ide. Kiñäşmäneñ axırında barlığı 74 tatar mäğlümat çarasınıñ problemaların iskä aluçı qarar qabul itelde. Anda äytelgänçä, xakimiät, ictimaği oyışmalar, eşmäkärlär belän bergä finanslaw mäs’älälären xäl itärgä, federal’ häm töbäk saylaw kampaniälärendä milli-mänfäğätlärne yaqlawnı täqdim itärgä, internetnıñ tatar öleşen üsterergä yärdäm itärgä kiräk.

Tatar mäğlümat çaraları arasında iñ aldınğısı itep İjawdağı milli xolding tabıldı. Könneñ ikençe yartısında Tatarstan gazet-jurnal redaksiälärendä tügäräk östäl söyläşülären uzdırğannan soñ, seminarda qatnaşuçılar İjawdağı tatar jurnalistlarınıñ aldınğı täcribäsen öyränergä baraçaq.

Bikä Timerova

XS
SM
MD
LG