Oppozitsion gäzitlär farazınça, ölkä başlığı Şamanovnıñ häm şuşı kandidatnıñ atom qaldıqların Mäläkästä, NİİARda eşkärtü buyınça mänfäğätläre täñgäl kilä.
Cirle räsmi gäzitlär bu mäsäläne urap ütä. Ä “Ömet” gäzitendä kandidat İvanovnıñ milli azçılıqlarnı da qayğırtuı turında yazma çıqtı. Tik şunısı bar: ğalim täqdim itkän ısullarnı milli ixtıäclarnı qanäğätländerü mäs`äläsen süzdä genä qaldıru buyınça tatıp qaralğan täcribä dip kenä sanap bula.Qızğanıç ki, tatar millätle kandidatlar milli mänfäğätlär turında süz äytmilär, barı tik hönärläre buyınça tege yäki bu täqdimnär belän çiklänälär. Millätçelektä ğäyeplänüdän qurqalar, küräseñ. Saqlıq ta kiräkter inde – ile şundıy bit: ruslarğa ğına mömkin üz milläte turında laf oru.
Bu yaqtan ayıruça “Rus'” firqäse häm jirinovçılar iñ aldınğılardır. Döres, alarnıñ bu ğämälen önämäwçe urıslar da oçrıy. Mäsälän, “Böyek Räsäy – Yevraziä berlege” firqäse liderı Pavel Borodin. Läkin anıñ da maqsatı – şul uq yunäleştä: SSSRnı torğızu.Xäyer, Räsäydä saylawlarnıñ ğädel bulğanı yuq häm moña ömetlänü dä qıyın. “Niçek tawış birü tügel - niçek sanaw möhimräk” digän postulatqa künegep betkän iç inde bez. Şunlıqtan saylaw aldı kampaniäseneñ faydasın başqa yaqtan ezläp qaraw xäyerleräk bulır. Äytik, “Räsäyneñ çın patriotları” digän partiä tarafdarları - “Tuğan tel” häm “Bolğarğa qaytu” oyışmaları, şul partiä isemennän milli-mädäni ixtıäclar turında awız tutırıp söyläw mömkinlegenä bik şat. Şöker, andıy fikerlär İPR programmasına da turı kilä. Şunlıqtan – mömkin. Milli xäräkätneñ iñ awırtqan cirläre turında başqa oçraqlarda bäyän itü mömkin bulmağaç, bu oçraqnı Allah büläge dip tä sanıylar milli xäräkät aktivistları.
Ayrat İbrahim, Sember.
