Rusiä matbuğatı da Tatarstandağı waqiğalarğa iğtibarlı. Şul isäptän, RBCdaily kebek citdi iqtisadıy mäğlümat çarası da. Tatarstan Konstitutsion mäxkämäseneñ latin grafikasın kertü qanuni yaqtan döres, dip qarar çığaruı xaqında yazıp çıqtı. Gäzit xäbärçese Aleksey Vinogradov «Qazan belän Mäskäw arasın Kiril belän Mefodiy boza» digän fikerdä tora. Bu yazma şulay isemlängän ide dä. Bu mäs’älä cirle häm küplär öçen qızıqsız kürensä dä, çınlıqta Rusiä öçen citdi näticälärgä kiterergä mömkin, dip sanıy yazmanıñ avtorı Aleksey Vinogradov. Ul mäsälän, 90nçı yıllarda SSSR tarqaluğa kitergän tarixi-mädäni başlanğıçlarnıñ berse – yazunı alıştıru taläbe buldı,di. Moldavannar, Rumıniägä yaqınayırğa teläp kiril yazuın latinğa alıştırdı. Äzerbäycan, Törekmänstan, Uzbäkstan citäkçeläre dä şul uq täqdimnärne yañğıratqan ide, dip iskä ala jurnalist. Anıñ fikerençä, Tatarstannıñ latinğa küçärgä teläwe, Mäskäwgä Çeçnyanı xäterlätkän. Cähar Dudayıv, İçkeriäneñ möstäqillege turında iğlan itkäç, iñ berençe itep, yazunı alıştırırğa alınğan ikän. Läkin bu eş bik qıybatqa töşkän, şuña axırına qädär citkerelmägän, dip yaza BRCdaily.
Läkin bu agentlıq fiekrençä, Mintimer Şäymiev iqtisadıy qıyınlıqlardan qurıqmıy. Aleksey Vinogradov uylawınça, Tatarstan Prezidentı bu säyäsi mäs’äläne 4nçe tapqır respublikanıñ citäkçese itep saylanu öçen qullana. Latin mäs’äläse federatsiäneñ bötenlegen küz aldında totqanda şaqtıy citdi bulırğa mömkin.
Tatar gäzitläre Konstitutsion mäxkmäneñ qararına añlatmalar birmäde. Ä Вечерняя Казань gäzite – birde. Xäbärçe üz yazmasına «Başnı kiskäç, tel turında yılamıylar» digän isem birgän ide. Anıñ yazuına qarağanda , «Berdäm Rusiä»neñ respublikasına äylängäç, tellärneñ möstäqillege turında uylap bulmıy.Bikä Timerova.
