Accessibility links

җомга, 9 декабрь 2016, Казан вакыты 16:45

Yekaterinburgtan xäbärlär


Sverdlov ölkäsendä uzdırılğan 2003nçe yılnıñ iñ kiñ qolaçlı waqiğalarınıñ berse – Milli mädäniätlär festivale axırına yaqınlaşa. Bu könnärdä festival' qısalarındağı soñğı çaralar ütkärelä. Sverdlov ölkäse millätara kitapxanäse festival' qısalarında uzdırılğan “Ural – yöz xalıqnıñ üz yortı” dip atalğan çarağa yomğaq yasadı. Yomğaqlaw kiçäsenä törle milli-mädäni oyışmalar wäkilläre cıyılğan ide. Bu çarada aktiv qatnaşuı öçen kitapxanäneñ iñ aktiv uquçılarınnan berse, Mäcit Ğafuri isemendäge tatar-başqort milli-mädäni cämğiäte räise Söfxät ağa Nadıyrov maxsus büläkkä layıq buldı.

Festival' qısalarında uzdırılğan tağın ber çaralarnıñ berse Yekaterinburg şähäre milli-mädäni moxtäriäte räise Eliza Safiullina tarafınnan uzdırılğan yazuçılar oçraşuı kiçäse buldı. Kiçädä Ural töbägendä yäşäp icat itüçe yazuçılar qatnaştı. Arada, Sverdlov ölkäse yazuçıları belän berrättän, Çiläbe ölkäsennän kilgän tatar yazuçısı İrek Sabirov häm başqort yazuçısı Ramazan Şagaliev ta bar ide. Oçraşu waqıtında yazuçılar biregä cıyıluçılarnı üzläreneñ tormış häm icat yulı belän tanıştırdılar. Şulay uq törle temalarğa fiker alışular buldı. Ural yazuçıları cämğiätneñ bügenge köne, ictimaği-säyäsi waqiğalar turında da süz alıp bardılar. Qäläm iäläreneñ cılı, dustanä oçraşuı qatnaşuçılarnıñ küñelendä uñay tä'sir qaldırdı. İke töbäk yazuçıları kiläçäktä dä bergä aralaşıp yäşärgä süz quyıştılar.

Küptän tügel Sverdlov ölkäse xalıqları icatı yortında uzdırılğan zur kiçä şulay dip ataldı. Kiçäneñ töp geroe Wäcit ağa Zinnurov buldı.

Wäcit ağa ğömere buyı Uralmaş sistemasında eşlägän. Ul monnan 40 yıl elek Uralmaş laklarında yäşäwçe tatarlarnıñ mädäni tormışın iñ berençelärdän bulıp oyıştıra başlağan keşe. Ul yıllarda Wäcit ağa Uralmaş zavodı mädäniät sarayı qarşında tatar üzeşçän sänğät tügäräge oyıştırğan. Tügäräktä qatnaşuçılar tamaşaçılar aldında törle spektakl'lär, konsertlar belän çığış yasağannar. Alarnıñ çığışın xalıq härwaqıt kötep alğan, yaratıp qabul itkän. Ä 70nçe yıllar başında, kollektivqa yäş, talantlı yeget İlgiz Safiullin kilgäç, anıñ citäkçelegendä “Yäşlek” isemle vokal'-instrumental' tatar estrada ansamble tözelä. “Yäşlek” ansambleneñ ğömere ozın bula, ul Wäcit ağa layıqlı yalğa çıqqançı, yaña ğasır başına qädär eşläp kilä.

Wäcit abıynıñ qul astınnan İl'dam Şaripov, Fäwziä Ğalieva, Boris Zakirov kebek xäzerge waqıtta bik tanılğan Ural cırçıları tärbiälänep çıqqan. Ul waqıttağı Wäcit abıynıñ uñ qulı bulıp sanalğan İlgiz Safiullin “Şulqädär fanatizm däräcäsendä üz eşenä birelgän keşe ide ul Wäcit abıy”, - dip iskä ala. Çınlap ta, bernindi matdi nigez bulmıy torıp 40 yıl buyı tatar estrada ansamblen citäkli alu bik zur ixtıär köçen taläp itkänder. Andıy xezmät olı xörmätkä layıq.

Anıñ yubiley bäyräme kiçäsenä dä xalıq bik küp cıyılğan ide. Kiçädä iñ izge teläklär belän qotlaw süzläre yañğıradı. Annan soñ Wäcit abıy citäkçelegendä üzeşçän sänğät tügärägenä yörgän cırçılar, biyuçelär, näfis süz ostaları bik matur konsert quydılar. Zur säxnädä kiç buyı kütärenke bäyräm ruxı xökem sörde.

Küptän tügel Yekaterinburg şähärendä Matbuğat, televidenie häm radio buyınça Ural töbäqara idäräse, Sverdlov ölkäse jurnalistlarınıñ icadi berlege häm Yekaterinburg şähäre başlığı kitapxanäse tarafınnan uzdırılğan “Pressa – 2003” dip atalğan 8nce kürgäzmä-bäygegä yomğaq yasaldı. Quanıçıbızğa qarşı, bu yulı Sverdlov ölkäsendä çığarıla torğan berdänber tatar gazetası “Saf çişmä” dä iğtibarsız qalmadı. “Şähärebez keşeläre yazmışı” nominatsiäsendä kürenekle millättäşebez, al'pinist Salawat Xäbibullin turındağı mäqälä ciñep çıqtı. “Milli Media-Xolding” tarafınnan menä inde ike yıldan artıq çığarıla torğan aylıq gazeta – “Saf çişmä” maxsus diplomğa layıq buldı.

Fäwiä Safiullina.Yekaterinburg.

XS
SM
MD
LG