Accessibility links

җомга, 9 декабрь 2016, Казан вакыты 01:09

Cäy mizgelläre www.Azatliq.ru/foto säxifäsendä


Bilgele bulğança, uzğan yılğı tatar yäşläre könnäre berençe tapqır “Boris Polevoy” teploxodında oyıştırıldı. 14 yıl buyı “İdel“ lagerında uzdırılıp kilgän älege çara teploxodta ütkäreläçäk digäç törle fikerlär işetergä turı kilde. Ayıruça Qazandağı tatar yäşläre monıñ belän qänäğät tügellär ide. Çönki alarğa cäy könne ber atna ğına bulsa da çittän kilgän tatar yäşläre belän aralaşu, kiçke uyınnarda qatnaşu, İdeldä su qoyınu mömkinlege tua ide. Ä teploxodqa Qazandağı tatar yäşlärennän barı diskoteka alıp baruçı Zölfät Zinnurov häm berniçä jurnalist qına alındı. Şul säbäple Qazandağı tatar yäşläre oyıştıruçılarğa bıyıl beraz üpkäläp tä qaldı. Tağın şunısı üzençälekle, uzğan yıllarda tatar yäşläre könnären barı yäşlär ministrlığınıñ “İdel” yäşlär üzäge genä oyıştırsa, bıyıl älege eşkä tatar kongressı da quşıldı. Äytergä kiräk, “İdel” lagerı belän çağıştırğanda teploxodqa zurraq çığımnar totıldı. Ber keşegä täwlegenä meñ yarım çıqtı. Läkin Tatarstan xökümäte yäş millättäşlärebezgä aqçasın qızğanmadı. Programma da şaqtıy bay tözelgän ide. Çit töbäklärdän kilgän tatar yäşläre Tatarstannıñ Bolğar, Çallı, Alabuğa, Çistay şähärläre belän tanıştılar, küp kenä oçraşularda qatnaştılar. Ägär “İdeldä“ uzğanda yäşlär kübräk köndezlären yoqlap, tönnären qaysı-qayda yörep ütkärsä, monda barısı da uqmaşıp uzdı. Şuña yäşlärgä ber-berse belän tanışu mömkinlege zurraq buldı. Älege säbäptänder tatar yäşläre könnärendä bulğan millättäşlärebez dus-işlären xäzer dä sağına. Bu xaqta yäşlärneñ törle saylardan üzara aralaşuınnan belergä mömkin. Xätta inde alar qunaqqa da yöreşä başlağannar. Küptän tügel genä Mäskäw, İvanovadağı tatar yäşläre Vladimirdağı “Bäxet” oyışmasında qunaqta bulıp qaytqannar. Şul waqıtta tatar yäşläre könnärendä töşkän fotolarnı tuplaw buyınça da süz quzğatılğan. Çönki yäşlär yıl sayın räsemnärne üz fotoapparatına töşerä dä üzlärenä genä qaldıra. Ä töşerer apparatları bulmağan yäşlär qaysı qaydan foto sorarğa mäcbür bula. Bıyıl isä yäşlärgä bäxet yılmayğan. Rimzil Wäliev tatar yäşläre könnärennän 250 mizgelne töşerep alğan. Häm bu könnärdä “Azatlıq”nıñ Qazan byurosına İvanovadağı Lena Xämidullina häm Vladimirdağı Ädilä Batorşinadan älege fotolarnı internetqa quyunı sorap xat kilde. Alar xatnı böten tatar yäşläre isemennän yullağannar. Xäzerge waqıtta 14 nçe tatar yäşläre könnärendäge fotolar “Azatlıq” radiosınıñ saytında elenep tora. Adresı – www.azatliq.ru/foto

Älege fotolardağı mizgellär, bu salqın könnärdä böten Rusiä buyınça sibelgän tatar yäşläreneñ yöräklären cılıtıp cibärer dip uylıybız. 36 räsemnän torğan 6 blokta nindi genä yäşlärebez yuq – sarı çäçlese dä, qarası da, qısıq häm zur küzlese dä. Qısqası saytnı açıp qarağaç üzegez barısın da kürersez. Älege räsemnär bu bittä ğinwar azağına qädär elenep toraçaq.

Landış Xarrasova.

XS
SM
MD
LG