Accessibility links

дүшәмбе, 5 декабрь 2016, Казан вакыты 05:33

Televidenie häm radio millätkä yärdäm itärme?


22nçe ğinwarda Bötentatar ictimaği üzäge häm Bötentatar “Mäğärif” bergälege BTİÜneñ utırışlar zalında “Tatarstan teleradiokompaniäläre eşçänlege häm tatar mänfäğäte” digän temağa cämäğätçelek cıyını uzdırdı.

Utırışqa radio-televidenie citäkçeläre, jurnalistlar, şulay uq radio-televidenieneñ açıluınnan uq eşlägän veterannar da kilgän ide.

Utırışta cämäğätçelek menä närsälär turında süz alıp bardı. Tatarstanda televidenie radio tatar xalqın berläşterep toruçı, anıñ tormışın tä'min itüçe ber çara bulıp torğanı turında äytelde.Ämma bu çaranıñ tulısınça qullanıluı şikle dip äytüçelär dä buldı. “Tatarstanda xalıqlar telläre turında“ğı zakonnıñ tulısınça ütälmäwenä televideniedäge , radiodağı tapşırularnıñ tatar telendä rus tele belän çağıştırğanda az buluı da kiñ cämäğätçelekne borçuı turında äytelde. Millätne, telne saqlawda , xalıqnıñ mädäniäten üsterüdä mäğlümat çaraları zur rol' uynıy. Rusiädä radio televidenie kanalları aşa xalıqlarnı ruxi yaqtan buysındıru bara. Ruxi yaqtan basıp alu Rusiä kanalları aşa Tatarstan informatsion kanallarına da kilep kerde. Tatarça tapşırular kübäymäde, ä kiresençä, rusça tapşırular arttı.Bolar turında başqa töbäklärdä yäşägän millättäşlärebezneñ zarları da bezne kisätep tora digän fikerlär dä işetelde. Zaman quyğan taläplärgä bügenge Tatarstan radio-televidenielärneñ sıyfatı, eçtälege, yünäleşe turında cämäğätçelek bergäläşep süz alıp bardı.

Distälägän keşe çığış yasadı. Televidenie veterannarı Äxmät Räşitov, Äminä Safiullina,Rinat Yosıpov häm başqalar.Törle ictimaği oyışmalardan Ğälilov Waqif, İlmira İdiätullina, Rafael'Salmyşev, İldus Sadıyqov. Şular arasınnan Mäxmüt Äxmätcanov belän Zöfär Salievlarnıñ xalıqnıñ telen , mädäniäten saqlap qalu turındağı fikerläre belän urtaqlaşqan çığışları bik yalqınlı buldı.

Çığış yasawçılar arasında TNV kanalınıñ citäkçe urınbasarı Miläwşä Aytuğanova häm GTRK kanalı räis urınbasarı Liä Zahidullina da bar ide.

Miläwşä Aytuğanova üzeneñ çığışında TNV kanalınıñ xäzerge torışı, tatar jurnalistlarınıñ citärlek bulmaw problemaları häm televidenieneñ perspektivaları turında da söyläde. Häm bik küp sorawlarğa cawap birde.

Cıyılışnıñ qabul itkän Qararın BTİÜ räise Räşit Yäğfärov işetterde. Qararnıñ eçtälege menä şundıy:

1. Rusiä kanallarında tatar telendä radio- teletapşırularnı

buldırunı taläp itep V.V.Putinğa Häm Rusiä Däwlät Dumasına xat belän möräcäğät itärgä;

2.Tatar telendä törle töbäklärdä retranslyatsiälär buldıru öçen iärçenle sistemalarnı qullanu;

3.Tatarstanda televideniedä säyäsi tapşırular az bulu säbäple “Dönya häm bez” tapşıruın yañartu;

4. Söyläm tele kul'turasın üsterü buyınça zur eş alıp barırğa; 5. Başqortstanda Tatarstan televideniese kürsätelmäwe säbäple, Tatarstan xökümäte belän Başqortstan xökümätläreneñ arasında söyläşülär alıp barırğa”- dip täqdimnär qabul itelde.

Zaman taläplärenä cawap birerlek , tatar xalqına xezmät itüçe radio televidenie buldırır öçen eşlise eşlär çınnan da küp äle..

Azatlıq radiosı Mälikä Basıyr, Qazan.

XS
SM
MD
LG