Sişämbe irtäsendä, Qazanda, ikençe bötendönya suğışında häläq bulğan suğışçılarğa quyılğan häykäl yanında patriotik çara uzdı. “Snejnıy desant” yäğni “Qar desantı” xäräkäteneñ warisları Qazan yuğarı uqu yortlarında tözelgän student otryadların Tatarstannıñ 5 rayon häm şähärlärenä ozattılar. Bu xäräkät Tatarstanda inde 35 yıl yäşäp kilä. Bu xäräkätneñ başqa iseme dä bar-“Yäş eztabarlar”. Çönki bu student otryadlarınıñ töp şöğele elekkege Sovetlar Soyuzınıñ Böyek Watan suğışı barğan cirlärendä häläk bulğan watandaşlarıbıznıñ ezlären, cirlänmi qalğan gäwdälären tabu ide. 35 yılda baytaq izge eşlär başqarıldı. Meñlägän yaqtaşlarıbıznıñ gäwdäläre, dokumentları, şäxsi äyberläre tabıldı. Suğış qırlarında xäbärsez yuğalğan digän xäbären alğan yaqtaşlarıbıznıñ suğıştan soñ 25, 30, 40 yıl uzğaç qayda nindi şartlarda häläk buluı açıqlandı. “Qar desantı” xäräkäte respublika “Xäter kitabına” nigez saldı. Räsmi xäbärlärdä- “Qar desantı”nıñ bıyılğı poxodı Böyek Watan suğışında Sovetlar Soyuzınıñ ciñüenä 60 yıl tuluğa bağışlana- dielä. Student otryadları Aqsubay, Alekseyevski, Çallı, Tübän Qama rayonnarında häm şähärlärendä suğış häm tıl veterannarınıñ xälen belep, isemleklären täğäyenläp yöriäçäklär. Bu çaranıñ säyäsi maqsatları da bar. Bıyılğı desantnı “Yedinaya Rossiä” firqäseneñ yäşlär qanatı oyıştırğan. Äytergä kiräk Tatarstanda “Yedinaya Rossiäneñ” yäşlär qanatı da parlament saylawları aldınnan yaxşı uq “cilpenä”. Här xäldä “Yedinaya Rossiä”neñ yäşlär qanatına cilgä qarşı oçarğa turı kilmäde. Anıñ citäkçese jurnalist Dmitriy Vtorov, inde xäbär itüebezçä firqä isemlegendä dürtençe bulıp bara. Jurnalist xalqı arasında da Dmitriy Vtorov kiräk waqıtta tatarça qıstırıp häm keşe qara kürmägändä Mintimer Şäymiev bulıp osta söyläşä belüe belän dä populyarlıq qazandı. “Biräm digän qolına- çığarıp quya yulına”- digännär borıñğılar. Menä “Qar desantınıñ” 35 yıllıq täcribäse dä yäşlär qanatınıñ saylaw aldı piar kompaniäsenä eşli başladı.
Ministrlar Kabinetınıñ sişämbe brifingı oborona- saqlanu şirkätlärenä bağışlandı. Brifingnı alıp baruçı İqtisad häm sänäğät ministrı urınbasarı Sergey Muxin töp yañalıqnı äytte. Tatarstannıñ aviatözeleş şirkätläre- Qazan boralaqlar zavodı häm Aviatözeleş berläşmäläre Rusiäneñ yaña oyışaçaq aviatözeleş konsernına kermäyäçäk. “Äle waqıtı citmäde” dide ministr urınbasarı. Tatarstan sänäğätçeläre bulaçaq konsertnıñ “Boing” konsernı kebek konsernnar belän köndäşlek itärlek oçqıçlar citeşterüenä ışanmıylar.
İnde xäbär itkänebezçä düşämbe, bäyräm könne, Qazanda rayon, şähär, ministrlıylar citäkçeläre qatnaşında yıl näticäläre buyınça bik zur kiñäşmä buldı. Yılnıñ iqtisadıy näticäläre turında tıñlawçılarıbızğa berniqädär söylägängä kürä kiñäşmädä söyläşengännärneñ tıñlawçılarıbız öçen qızıqlıların saylarğa tırışırbız. 2003nçe yılda respublikanıñ töp qazanışı ul statistika urtalığındağı Tatarstanda yäşäwçeneñ kereme buyınça yarlılıq çigennän çığuı. Rusiäneñ tormış däräcäse üzäge mäğlümatlarınça - Tatarstan tormış däräcäse indikatorı reytingında 9 urın tota ikän. Moña qarata prezident Mintimer Şäymievneñ - kesäñ tulı aqça bulıp asfal’t yullar urınına, pıçraq yırıp yörsäñ, yäğni tormış itüneñ sıyfatın bäyäläwgä küçergä kiräk digän fiker äytüe bik ğibrätle.
Yunıs Ätnäle.
