Britaniä tışqı eşlär ministrı Jack Straw Ğiraqtağı xäzerge wazğiät – uzğan yılda koalisiä köçläreneñ Saddamnı bärep töşergännän birle – iñ awır bulıp qala, dide.
Ğiraqtağı şiği möselmannarı yulbaşçısı Moqtada as-Sadr bügen amerikan prezidentı George Bush'nı "doşman" dip atadı häm ğaskärlär Ğiraqtan çığarılmasa – revolüsiä belän yanadı.
Şuşı belderüne as-Sadrnıñ wäkile şäix Jaber al-Xafagi Kufa şähärendä comğa wäğaze waqıtında uqıp birde. Xatta şulay uq Bush – "ilneñ böten xalqına qarşı suğış alıp bara, könyaqtan tönyaqqa häm könçığıştan könbatışqa qadär", dielä.
Amerikan ğaskärläre könbatıştağı Falluca şähäre öçen xärbi çaralarnı tuqtatıp tora. Ğiraqnıñ amerikan idaräse başlığı Paul Bremer – nizaqnı söyläşülär aşa xäl itü ixtimalı turında belderde. Ämma xärbi çaralar tuqtatılsa da xärbilärneñ üz üzlären yaqlarğa xoquqı bar, dide
Ul arada ğiraq ğısyançıları Falluca belän sönni möselmannarı kontrolendä bulğan Abu Ğarib şähäre arasındağı olı yulnı üz kontrolenä aldı. Anda Abu Ğarib şähärendä amerikan maşinalarınnan torğan konvoyğa ut açılğan, näticädä kimendä 9 keşe hälak bulğan, dip xäbär itelä. Bäreleşlär ilneñ başqa öleşlärendä dä däwam itä.
