Accessibility links

якшәмбе, 4 декабрь 2016, Казан вакыты 15:28

Mintimer Şäymiev: Respublika xökümätendä kisken üzgäreşlär kötelmi


20 may könne Tatarstan prezidentı Mintimer Şäymiev Radio Rossii kanalı jurnalistınıñ sorawlarına cawap birde. Bu yulı Mintimer Şäymiev Radio Rossiinıñ Persona Grata tapşıruında Qazanda torıp qına qatnaşıp, Mäskäwdäge jurnalist Vitaliy Uşkanovnıñ sorawlarına cawap birde. Äñgämä Qazanıñ meñyıllığı xaqında söyläşü belän başlanıp kitte. Moña çärşämbe könne genä Qazanğa bäyräm ütkärü tärtipläre belän tanışırğa kilgän Yaroslavl’ ölkäse gubernatorı Anatoliy Lisitsinnıñ vizitı da buldı. Mintimer Şäymiev fikerençä, älegä bäyräm respublika, şähär citäkçeläreneñ genä tügel, ä ğadi xalıqnıñ da küñellärenä ütep kerergä tieş. Ul qazanlılarnıñ köndälek tormışında çağılıp, anı yaxşırtırğa tieş, dip tä östäde ul. Prezident fikerençä, Qazannıñ yubileyına äzerlek däwerendä qazanlılar öçen şaqtıy küp närsälär eşlänelgän – 30 meñ ğailä iske yortlardan yañalarğa küçerelgän, şähärne tözekländerü, yullarnı kommunikatsiälärne yañartu da däwam itä. Şulay uq äñgämä waqıtında jurnalist Şäymievtan respublika xalqınıñ könküreş tormışı xaqında, alarnıñ yäşäw däräcäse, bäyälär turında soraştı.

Respublika tormışınnan süz Mäskäwdä bara torğan administrativ reformalarğa küçte. Alarğa qarata da Mintimer Şäymiev tıñlawçılarğa üz fikerlären äytte. Xäzerge räweştä barğan reformalar töbäklärdä berniçek tä qullanıla almıy. Älege administrativ reforma näticäsendä xakimiät oyışmalarınıñ häm çinovniklarnıñ sanı kiresençä arttı ğına, dide Şäymiev. Vitaliy Uşkanovnıñ, dimäk sezneñ respublika xökümätendä üzgäreşlär bulmıymı, digän sorawına, ul, üzgäreşlär bulmıy tormas inde, tormış üzgärep tora bit. Läkin alar bulsa da, xäzer Mäskäwdä bara torğan reformalar bulmayaçaq, dip cawap birde.

Şulay uq äñgämä waqıtında Mintimer Şäymiev töbäklär belän üzäk arasındağı mönäsäbätlärgä tuqtaldı, üzeneñ Rusiä prezidentı Vladimir Putin belän 12 mayda bulğan oçraşuı turında söyläde. Anda Mäskäw-Qazan mönäsäbätläre, artıq yış üzgärep tora torğan salımnar mäs’äläse, respublikanıñ neft tabu tarmağı xaqında süz barğan.

Radio Rossii kanalınıñ Persona grata tapşıruında iskä alınğan tağın ber tema tıñlawçılarğa qızıqlı bulır, möğayın. Alıp baruçınıñ, prezident wazifasınnan kitkäç, sez üzegezneñ urınığızda kemne küräseñ, digän sorawğa, Mintimer Şäymiev menä niçek cawap birde. Tatarstanda respublika xalqı mänfäğätlären qayğırtıp, äybät itep eşläwçelär bik küp, bez berqayçan da yaxşı kadrlarnı çitkä cibärmädek. Bezdä yäş, buldıqlı, beldekle komanda eşli. Kiläçäktä dä respublika belän citäkçelekne, demokratik saylawlar nigezendä inde älbättä, respublikadağı kadrlarğa yöklärbez, dide.

İşetkänegezçä, Mintimer Şäymiev Tatarstannıñ bulaçaq prezidentı itep, barı tik xäzerge waqıtta respublikada eşläwçe keşene genä kürä. Xäyer, bu äle Şäymievnıñ uyları ğına. Çınbarlıqta niçek bulasın isä waqıt kürsäter.

Gölnaz İlgizär

XS
SM
MD
LG