Accessibility links

сишәмбе, 6 декабрь 2016, Казан вакыты 05:55

Tatnet: Tatfak internet säxifäsen açtı


Bu atnada Tatarstan başqalası - Yevropa häm Aziä şähärläreneñ üzägenä äwerelde. 3-4 köngä Qazanğa 50 ildän şähär başlıqlıları, borınğılıqnı öyränüçe ğalimnär, törki dönyada tanılğan bilgele keşelär kilde. Ata-babaylardan qalğan borınğı mirasnı saqlap qalu problemaları – Qazan häm başqa tarixi şähärlär öçen urtaq, şuña da bu ölkädä täcribä urtaqlaşu uñay näticälär birer, dip uylanıla. Qazannıñ 1000 yıllığın kiñ küläm bäyräm itü dä, Tatarstan başqalasın dönyağa tanıtırğa tieş. Şulay ber zaman, Qazanğa dönyanıñ törle poçmaqlarınnan turistlar kilä başlayaçaq, alar monda qaldırıp kitkän aqçağa Qazandağı yullar da tözäteläçäk ikän, dip söylägän ide ber şähär çinovnigı. Ä aña qädär başqalanıñ yözen, üzençäleklären kürsätü sorala. Bigräktä virtual dönyada. Tatarstan başqalası turında säxifälärne qayda tabıp bula?

Şähärneñ räsmi säxifäse kazan.org.ru adresında urnaşqan. Anda başqala tormışında bulğan waqiğalar yılyazması basılıp bara, şähär xakimiätläre, eş yünäleşläre turında mäğlümatlar tuplanğan. Şulay uq, kazan.org.ru saytında Qazan räsemnären kürergä häm qısqaça tarixı belän dä tanışırğa mömkin. Tatar xalqınıñ ğöref-ğädätläre, tele, mädäniäte turında mäğlümat bulsa da, saytta ber genä tatarça süz yuq. Kazan.ws – internet säxifäse – küñel açu partalı digän isem belän açılıp quya. Anda mäsälän, üzeñä sayt yasarğa täqdim itelä, anıñ öçen buşlay ürnäk bar. Mobil telefonğa köy quyıp bula, internet aşa SMS cibärergä häm başqa şundıy populär mömkineklelär birelä. Älege saytta da tatarça tekstlar yuq, barı tik tatarça cırlarnıñ buluı ğına, tatar telle şähärdäşlär turında iskä töşerä. Kazan.ws saytında Salawat, Aydar Ğalimov, Zäynäpneñ lazer tälinkälärenä kergän köylärne küçerep alıp bula. Qazannıñ 1000ylığıan bağışlağan maxsus sayt ta bar. Anıñ adresı : www.kazan1000.ru . Bu - yubileyğa bağışlağan maxsus internet säxifäse. Anda räsmi qararlar belän bergä, bäyrämgä qağılışlı yañalıqlar, äzerlek eşläreneñ barışı, Qazan räsemnäre, tanılğan keşelär xaqında mäğlümat, başqalanıñ mädäniäte, teatrları, muzeyları xaqında xäbärlär tuplanğan. Säxifädä milli bizäklär bulsa da, tatar zıyalıları turında söylänsä dä, saytta tatar telendäge büleklär yuq. Qazan turında www.tatar.ru ,www.kzn.ru, www.kazan.ru häm başqa adreslarda qararğa bula.

Üzeneñ 200yıllığın bäyräm itüçe Qazan universitetı internetta säxifäsen açıp cibärgän. Anıñ adresı - www.ksu.ru . Anda Qazan Däwlät universitetına qağılışlı barlıq mäğlümatnı diärlek tabıp bula: fakultetlar, qabul itü şartları, imtixannar, universitet xezmätkärläreneñ telefonnarı häm başqalar. Adresın qabatlıym- www.ksu.ru Säxifä yuğarı professional däräcädä eşlänsä dä, anda tatar telendäge bülek qaralmağan, ingliz telendägese bulsa da.

Bälkem, sayt xucaları tatar fakul’tetınıñ saytına urın birep, tatarça tekstlar urnaştırmaw kimçelegen qaplarğa bulğandır. Bu xälneñ xisle yağı bezgä mäğlüm tügel, ä menä tatfaknıñ internet säxifäse universitet saytında küpmeder urın alıp toruı adrestan uq kürenep tora :tatar.ksu.ru

Säxifä «Tatar tele, ädäbiäte häm tarixı fakul’tetı saytına räxim itegez!» digän yazu belän açılıp kitä. Säxifäneñ maqsatı häm eçtälege turında täwge bittä bolay dip yazılğan :«Biredä sez fakul’tet tormışına çumıp, studentlar, möğälimärneñ fänni häm icadi eşçänlekläre belän tanışa alasız. Şulay uq, sez tatar dönyasına qarağan küp kenä faydalı häm kiräkle mäğlümatlarnı tabalasız». Başqalardan ayırmalı bularaq, älege sayt 4 törle alfavit häm 3 tel arasında saylarğa mömkinlek birä. Yäğni säxifä tatarçanı kurilça häm latinça täqdim itä, häm şul uq mäğlümatlarnı urısçağa häm inglizçägä tärcemä itep birä. Saytnıñ xäbärlär, kitapxanä, fakul’tetıbız, qunaqxanä kebek bülekläre bar.



Bikä Timerova, bike@azatliq.ru

XS
SM
MD
LG