Accessibility links

дүшәмбе, 5 декабрь 2016, Казан вакыты 17:44

Yäşlär parlamentı äğzälären niçek deputat bulırğa öyrätälär


3 sentäber könne, yun başında ğına oyıştırılğan yäşlär ictimaği palatasınıñ, cäyge yaldan soñ berençe utırışı buldı. Läkin qanunnar tikşerügä totınğançı, Yäşlär eşläre ministrlığı yäş deputatlarğa eşneñ cayın añlatu öçen, seminar –kiñäşmä ütkärergä buldı. Yäşlär ictimaği palatasınıñ äğzäläre, yäşlär oyışmaları citäkçeläre, awıl-rayonnarda yäşlär büleklärendä eşläwçelär, deputat nindi bulırğa tieş, häm niçek eşlärgä tieş, digän sorawlarğa tögäl cawap birä almıy. Çönki berseneñ dä, qanun çığaru ölkäsendä eşläp qarağan yuq. Qaysıberläre, bälkem xäzer genä, nindi wazifağa alınuın añlağandır. Şuña yäşlär Däwlät şurası räise urınbasarı Rimma Ratnikova, yäşlär ministrı Marat Bariev, Duma Deputatı Marat Ğilmetdnovqa eş tärtibe turında citdi soraw birüçelär buldı. Rimma Ratnikova, yäşlär palatası äğzälärenä möräcäğät itep, bezgä sezneñ küzallawığız, yäşlärçä qaraşığız bik kiräk, diep zur parlament deputatları belän xezmättäşlek itärgä çaqırdı. Belgänegezçä, Yäşlär parlamentında Däwlät Şurasına oxşatıp, törle yünäleştä eşläwçe komitetlar oyıştırdı. Alarğa kerüçe yäş deputatlar, zur parlamentnıñ komitetlarına barıp, seminar- kiñäşmäneñ ikençe yartısında, tanışıp, söyläşep utırdı. Yäşlär aldında yäşlär eşläre ministrı Marat Bariev ta çığış yasadı. Yäşlär parlamentı aldında berençe çiratta, «Yäşlär turanda»ğı qanunnı qaraw, anı zaman taläplärenä turı kiterü, tözätmälärne kertü burıçı quyıla. Ämma ministr äytkänçä, yäşlärneñ mänfäğätläre başqa küp sanlı qanunnarğa kilep bäylängän. Mäsälän, taşlamalarnı aqçağa alıştıru turında mäğlüm qanun proyektı da, ictimaği oyışmalarğa, studentlarğa birelä torğan taşlamalarnı yuq itkän. Şulay uq, sotsial salımnarnıñ kimewe dä, yäşlär yalına birelä torğan aqçalarnı beterergä mömkin. Cirle üzidarä oyışılmalarnıñ eşçänlege dä turıdan turı, awıl, rayon yäşläreneñ eşlärenä qağıla. Ministr Marat Bariev, alğa taba iñ zur iğtibarnı byudjet turındağı qanun proyektına yünältergä kiñäş itte. Yäşlär palatası aralarında bulğan 1 deputat Dmitriy Ftorov häm yäşlär eşlären bağuçı komitet deputatları aşa zur parlamentnıñ eşendä qatnaşa ala. Ä nindi sotsial programmalarğa, küpme aqça sorarğa, bu xaqta ministrlıq häm başqa cawaplı keşelär yäşlärgä kiñäş birer.



Bikä Timerova.

XS
SM
MD
LG