Comğa könne Qazannan Beslanğa gumanitar yärdäm kitte. Qazan milli mädäni üzäge yanında irtänge säğät unda Osetiägä gumanitar yärdäm kolonnasın ozatu tantanası uzdı. Anda xökümät wäkilläre, din ähelläre, respublikanıñ törle milli-mädäni oyışmaları wäkilläre qatnaştı häm Beslan xalqına teläktäşlek belderep çığışlar yasadı. Tatarstannan comğa künne kitep, 2 meñ km yul ütäse gumanitar yärdäm kolonnasın respublikanıñ Ğädättäntış xällär ministrlığı xezmätkärläre alıp bara. Alalar arasında sentäber başında faciğä bulğan Beslannıñ berençe mäktäbeneñ elekkege uquçısı, xäzerge köndä Qazanda, şuşı ministrlıqta eşläwçe İgor’ Subbotin da bar. Tatarstanlılar Tönyaq Osetiädäge faciğägä taruçılarğa öç yanğın sünderü torğan KamAZ maşinası, ike NefAZ avtobusı, respublika şirkätlärendä citeşterelgän kiem-salım, öske kiem, darular, azıq-tölek – pränek, täm-tom, çäk-çäk – barısı 400 meñnän artıq sumğa äyberlär cibärde. Aña qädär Tatarstannan Beslanğa aşığıç yärdäm maşinası kitkän ide. Annan tış, respublika xalqı, törle oyışmalar Beslan xalqına yärdäm yözennän şaqtıy ğına aqça da cıydı. Küp kenä şirkät, oyışmalar xezmätkärläreneñ ber könlek eş xaqı, şaqtıy ğına keşelärneñ iğänä aqçalarınnan 17 million sumnan artıq aqça cıyğan. Boları bik äybät anısı, läkin menä Rubin futbol komandasınıñ Şinnik uyınçıları belän matçına kilüçe, xätta bilet aluçı bulmadı diärlek. Gärçä, älege uyınnan kergän bar aqçanı Beslan xalqına cibäreläçäk dip şaqtıy ğına reklamalansa da.
Tatarstanda Belarus’ respublikası räsmi delegatsiäseneñ vizitı däwam itä. 16 sentäber kiçendä Qazanğa Belarus’nıñ premyer-ministrı Sergey Sidorskiy citäkçelegendä respublikanıñ xökümät wäkilläre kilde. Comğa könne alar başqala belän tanıştı, ikeyaqlı xezmättäşlekne üsterü xaqında söyläşülär alıp bardı. Tatarstan belän Belarus’ neft’ häm nefteximiä, traktorlar tözü, trolleybuslar citeşterü ölkäsendä tığızraq aralaşırğa niätli. Qazan belän Minski şähärläre dä xezmättäşlek turındağı kileşüne imzaladı. Sergey Sidorskiy citäkçelegendäge delegatsiä şulay uq Alabuğa, Çallı şähärlärendä bulaçaq. Qazanda bu könnärdä tabiplar cıyılışları uza. 16 sentäberdä başqalada morfologlarnıñ VII xalıqara kongressı uzsa, comğa könne monda embriolog häm gistologlarnıñ V bötenrusiä qorıltayı eşli başladı. Älege märtäbäle cıyılışlarnıñ Qazanda uzuın belgeçlär Tatarstanda meditsina fäneneñ şaqtıy alğa kitkänlege belän añlatalar. Xäyer, bezdä meditsina tarmağında ğına tügel, xärbi belem birü ölkäsendä dä täcribä şaqtıy. 17 sentäber könne Qazanda Suvorov uçilisçası üzeneñ 60 yıllıq yubileyın bilgeläp ütte. Soñğı yıllarda xärbi xezmätneñ abruyı kimesä dä, älege uqu yortında belem alırğa teläwçelärneñ sanı şaqtıy. Xäyer, Suvorov uçilisçasın betergäç, xärbi genä bulırğa dimägän. Mäsälän, bu uqu yortınıñ tämamlawçı arasında ğalimnär, uqıtuçılar, xätta din ähelläre dä bar. Şularnıñ berse Qazan uçilisçasına yubiley uñayınnan Qazan izge ana ikonasın büläk itte.
Gölnaz İlgizär
