Accessibility links

шимбә, 3 декабрь 2016, Казан вакыты 18:43

Färit Urazaev: Tatarnıñ milli xäräkäte Tatarstanğa qarağanda Rusiä töbäklärendä köçleräk


Respublikada soñğı könnärdä tatar cämäğätçelege arasında häm cirle matbuğatta milli xäräkättäge büleneş, tatar ictimaği üzäge tiräsendäge nizağlar iğtibar üzägendä buldı. Xäyer, älege wazğiät Tatarstanda ğına tügel, Rusiä töbäklärendä dä borçu tudırdı. Respublikadan çittä yäşäwçe millättäşlärebez dä milli xäräkättäge büleneşkä bitaraf qalmadılar. Bu xaqta Azatlıq radiosınıñ Qazan studiäsendä Bötendönya tatar kongressı äğzäse häm tatarlarnıñ Federal’ milli-mädäni moxtariäte räistäşe Färit Urazaev söyläde.

Tatar milli xäräkätendä küp yıllar qatnaşuçı bularaq Färit Urazaev älege wazğiät xaqında üzeneñ fikerlären dä citkerde.

Beslandağı waqiğalardan soñ Rusiädä Konstitutsiäne bozıp bulsa da, keşelärneñ irek-xoquqların qısu küzätelä. Bu waqıtta tatar zıyalıları üzeneñ fikeren niçek belderä soñ? Qızğanıçqa qarşı, alar şuşındıy qatlawlı waqıtta waq-töyak problemalarğa kerep çumıp, törle törkemnärgä bülendelär. Bu xäl bezneñ milli xäräkätebezne bizämi. Minemçä, tatarnıñ milli xäräkäte tatarstanğa qarağanda Rusiäneñ töbäklärendä köçleräk häm nığraq. Alar çın problemalarnı nığraq toyalar häm sizemlilär

Färit Urazaev fikerençä, bügenge köndä Rusiädä sotsial’-iqtisadi xäl xäzerge tatar milli xäräkäte başlanıp kitkän 90 yıllar başındağıdan bik nıq ayırıla. Şuña da, ul waqıttağı milli fiker tatarlarnıñ xäzerge mänfäğätlären yaqlıy almıy, dip sanıy ul.

Söyläşüebezneñ axırında Färit Urazaev yaqınlaşıp kilüçe Xäter köne xaqında da iskä aldı. Anıñ fikerençä, älege çarada qatnaşu här tatar zıyalısı öçen namus eşe. Şuña da, Xäter könen berkem dä oyıştırmasa da, anda qatnaşuçılar barıber az bulmasqa tieş.

Gölnaz İlgizär

XS
SM
MD
LG