7 noyäberdä Qazanda Tatarstannıñ kommunistlar partiäse 1917 yıl inqilabınıñ çirattağı yıllığına bağışlanğan miting ütkärdelär. Kütärep çıqqan şiğar'lärendäge säyäsi taläplär bıyıl kübräk Rusiä xäkimlätenä bağışlanğan. Töp eçtälek şul- bu xakimiät xalıqnı xäyerçelektän, xaqsızlıqtan yaqlamıy. Anıñ soñğı waqıtta alıp barğan säyäsäteneñ xalıqqa qarşı asılı yıl sayın açığraq belenä. Kommunistlar liderlarınıñ berse, Däwlät Şurası deputatı Näsimä Stolyarova moña misal itep Rusiä Däwlät Dumasına saylawlarnı kiterde. Saylawlar aldınnan xakimiät ägärdä “Yedinaya Rossiä” nämzätlären saylasaq bezgä bay, mul tormış wäğdä itte. Ä ğämäldä “Yedinaya Rossiä” firqase wäkillärennän genä diärlek torğan yaña saylanğan Duma iñ berençe itep xalıqnı tağı da naçar xälgä qaldıra torğan sotsial' taşlamalarnı yuqqa çığara torğan kebek qanunnar qabul itte. Stolyarova çığışın xalıqnı qarşılıq kürsätergä uramnarğa çaqırıp tämamladı. Anıñ fikerençä Qazan uramnarına 200 meñ keşe genä çıqsa da, Rusiäneñ ğämäldäge xakimiäten üzläştergän baylıqların xalıq belän büleşergä mäcbür itep bulır ide. Ä menä elekkege “Ekonomiçeskiy prorıyv” ictimaği xäräkäteneñ elekkege räisenä Tatarstan xakimiäten wazifasınnan kitärgä mäcbür itü öçen 50 meñ keşeneñ uramnarğa çığuı da citä ikän. Çönki anıñ fikerençä, Tatarstanda saylawçılarnıñ yartısı kommunistlar partiäsen yaqlıy. Şulay itep, xalıqnı uramnarğa çığarırğa bik tezäwçelär bar. Läkin xalıqnıñ därte därmanı qaydadır? Menä zamanında böten Tatarstan xalqı cırlap biep ütkärä torğan uktäbr' bäyrämenä dä Qazanda küp digändä biş yözläp keşe cıyılğan ide. Xäyer uktäbr azağında demokratlar ütkärgän mitingqa da militsiä xezmätkärläre belän jurnalistlarnı quşıp sanağanda da küp digändä 200 keşe kilgän ide äle. Yunıs Ätnäle.
