İnde öçençe yıl rättän Üzäk televidenieneñ М1 kanalı ramazan ayına bağışlanğan 3 säğätlek oçraşular ütkärde. Soñğı oçraşu 15nçe noyäber könne buldı. Anda äytkänemçä 3 säğät däwamında bersen-berse alıştırıp Mäskäwneñ bilgele tatar keşeläre belän oçraşu ütte. Alıp baruçılar televizor qarawçılar belän dä turıdan-turı elemtägä kerep, alardan in tanılğan tatar keşelären atawnı soradılar. Şulay itep 3 säğät däwamında 200 dän artıq keşe telefonnan şaltıratqan häm peyjerğa maqtawlı tatarlarnıñ isemen atağan yazmalar cibärgän. Ä inde oçraşunıñ üzenä kilgändä bıyıl biredä Rusiäneñ Yevropa öleşe dini idäräse başlığı, Rusiäneñ möftilär şurası räise Rawil Gaynetdin,Tatarstannıñ tulı xoquqlı wäqälätle wäkile Nazif Mirixanov. “Tatarskie Novosti” gazetasınıñ baş redaktorı İlyäs Möslimov, 1186 mäktäp uquçıları häm uqıtuçıları. Şulay inde tatar törkeme dürtençe yıl belem alğan mäskäw pedagogiä universitetı studentları häm uqıtuçılar qatnaştı. Äytep ütelgän universitetqa bıyıl da 10 keşedän torğan yaña studentlar qabul itelde. Oçraşu aldınnan pedagogiä universitetı uqıtuçısı Landış Latfullina belän söyläşü mömkinlege dä buldı. Yaña qabul itelgän häm inde bıyıl dürtençe kursta uqığan studentlar turında söyläde ul yaña yılda da qabul itelü bulaçaq. Bez bügen televideniedän üzebez xaqında söyläp, yaña kursqa kilergä öndiäçäkbez , dide.. М1 kanalınıñ “Äzer bul” dip atalğan programmasında şulay uq Mäskäwneñ ber tatar restoranı da çaqırılğan ide. Alar anda pılaw peşerdelär. Häm tatar xalıq aşları turında söylädelär. Televidenie tamaşaçılarnı pärämäç, öçpoçmaq talqış kälävä, qaq häm başqa tatar rizıqları täqdim itelde. Osta peşekçelär xätta ul aşlarnı äzerläw ısulların da öyrättelär. Şulay uq mäskäw cırçıları Roza Xabibullina häm anıñ “Ayqay” törkeme cırçı häm kompozitor Nailä Fatexova da üz cırları belän bäyräm oçraşuların bizäde. Şul uq könne yäğni 15nçe noyäber kiç belän Rusiäneñ Yevropa öleşe dini idäräse bäyräm aşına küp törel qunaqlar çaqırıp, alar belän mäskäwneñ Prağa restoranında oçraşu ütkärde. Bu bäyräm aşına Rusiä prezidentı apparatınnan da, törle dini oyışmalardan da wäkillär kilgän ide. Häm şulay Çeçnyanıñ yaña saylanğan prezidentı Alu Aluxanov, häm Federatsiä şurasınnan bezgä tanış bulğan Ramazan Abdulatipov ta bar ide. Qunaqlarnı qotlağan çığışında Çeçnya prezidentı bar xalıqqa da tınıç tormış teläp, çeçen telendä Çeçen xalqın da qotladı. Ramazan Abdulatipov çığışında İslam mäs`äläse belän islam turında berni belmägän nadannar şöğillänmäsen ide digän fiker ütkärde. Federal` strukturalarda häm massaküläm mäğlümat çaralarında islam belgeçlären buldıru zaruri dip belderde. Ä inde prezident apparatı wäkile Rawil Gaynetdinne Ramazan bäyräme belän genä qotlap qalmıy, xalıq sanın isäpkä aluda möselmannarnıñ aktiv qatnaşuına räxmät belderep, maxsus medal' dä tapşırdı.
Mäskäw. Näzifä Kärimova
