Accessibility links

якшәмбе, 4 декабрь 2016, Казан вакыты 13:14

Çırşı bäyrämendä Qazan xanlığınıñ yığılu küreneşe kürsätelde


27 dekaberdä bulğan iñ zur çırşı bäyrämnäreneñ berse - 11meñnän artıq balanı cıydı. Anda respublikanıñ barlıq rayonnarınnan kilgän, tırışıp uqığan, sport bäygelärendä, cır häm biüdä zur uñışlarğa ireşkän balalar qatnaştı. Yäşlär eşläre ministrlığı tarafınnan oyıştırıla torğan bu bäyräm yıl sayın ütkärelä. Prezident iseme belän bäyle çırşı bäyräme Basket xol kebek zur binada uzdırıla, häm teatralläşterelgän tamaşa räweşendä oyıştırıla. Bu yulı da şulay buldı. Prezident yış qabatlıy torğan millätlär duslığı turındağı fikerne, tamaşanı säxnägä quyıçılar, konsert programmasında da çağıldırırğa tırıştı. Alıp baruçılar gel urısça ğına söyläşsälär dä, tatarça çığışlar da buldı. Qazannıñ 1000-yıllığına bağışlanğan säxnä küreneşe, ayıruça iğtibarnı cälep itte. Qılıç kütärgän suğışçılarnı, Qazan xanın, Söyembikäne biüçelär çağıldırıp birde. Xanlıqnıñ yığılu küreneşe, qara köçlär kilep, mul tormışnı yuq itte, dip ğäskäri kiemnän bulğan biüçelär kürsätep birde. Qazannıñ 1000 yıllığına bağışlanğan küreneş Çallıdan kilgän «Mizgel» teatrı başqaruındağı «Tuğan yaq» digän cır belän tämamlandı. Şulay uq, säxnädä Şaläpinğa bäyle waqiğalar da kürsätelde, KVN uyınçıları da, sportçılar da, keçkenä qızlar arasında çibärlek bäygesendä ciñgän balalar da çığış yasadı. Axırdan Glukoza isemle pop cırçı cırladı.



Respublika küläm çırşı bäyräme belän ber ük könne Qazan balaları öçen dä, şähär tantanası ütkärelde. Başqaladan yıraq torğan, ämma bik tırışıp uqığan malaylar häm qızlar yanına Qış babay belän Qar qızı, rayon häm awıl çırşı bäyrämenä kiläçäk.

Bikä Timerova.

XS
SM
MD
LG