Accessibility links

җомга, 9 декабрь 2016, Казан вакыты 18:32

Yekaterinburgta milli köräş bäyräme uzdı


Küptän tügel Yekaterinburg şähäre sport cämäğätçelege tormışında bik zur waqiğa bulıp uzdı – berençe tapqır bilbawlı köräş buyınça Ural küçmä kubogına Bötenrossiä turnirı ütkärelde.

Sverdlov ölkäsendä Älif Gabdraxmanov citäkçelegendä “Köräş” federatsiäse monnan biş yıl elek oyıştırılğan ide. Älege komanda Rusiä külämendä genä tügel, törle xalıqara turnirlarda da gel prizlı urınnarnı ğına yawlap kilde. Ä inde uzğan yıl Tatarstannıñ Quqmara rayonınnan tanılğan köräşçe Röstäm Wäliullinnıñ Uralğa küçep kilüe komandanıñ uñışların beremä-ber arttırdı disäk tä yalğış bulmas. Bu yulı Yekaterinburgta uzdırılğan turnir monı tağın ber tapqır rasladı.

Turnirda Başqortstan häm Tatarstan respublikalarınnan, şulay uq Sverdlov ölkäsennän tanılğan osta köräşçelär qatnaştı. Komandalar arasındağı yarışta Sverdlov ölkäse komandası berençe urınnı yawlap alıp, Kuboknı üzendä qaldırdı. Tatarstan komandası ikençe urında, Başqortstan komandası öçençe urında qaldı.

Absolyut berençelegendä Sverdlov ölkäse komandası kapitanı Röstäm Wälullin ciñep, absolyut batır bulıp qaldı. Şulay uq biş ülçäm berämlegendä tağın biş batır bilgelände.

Tatarstannıñ Uraldağı daimi wäkile urınbasarı Xäydär Gıylfanov äytüençä, sud''yalarnı ğädelsezlektä ğәyäpläp bulmıy. Alarnıñ kübese Başqortstannan kilgän. Ural komandası bu bäygegä bik nıqlap äzerlängän bulıp çığa.

Xäydär Gıylfanov bu yarışlarnı oyıştıruda Sverdlov ölkäse xökümäteneñ rolen bik yuğarı bäyäläde. Anıñ äytüençä, bu çara tulısınça ölkä xökümäte başlanğıçı belän häm byudjet aqçasına oyıştırılğan.

Bu yarışlarnı oyıştıruda şulay uq Tatarstan häm Başqortstan respublikaları xökümätläreneñ dä öleşe zur. Yekaterinburgta yäşäwçe tatar eşmäkärläre dä prizlar belän yärdäm itte.

Älege zur sport bäyräme bik matur tatar konsertı belän yomğaqlandı. Konsertta dekaber başında bulıp uzğan tatar cırın yäş başqaruçılarnıñ ölkä konkursı lawreatları çığış yasadılar. Tatarstannan maxsus kilgän tanılğan cırçı Röstäm Zakirov häm anıñ icat törkeme çığışı xalıq öçen zur büläk buldı.

Küptän tügel Yekaterinburg şähäreneñ çitendä urnaşqan Sadovıy bistäse mäktäbe üzeneñ 70 yıllıq bäyrämen bilgeläp ütte. Andıy mäktäplär il buylap bik küp, tügäräk datalar da yış bilgelänep ütelä. Ä menä bu waqiğağa iğtibar itüebezneñ säbäbe üzebezneñ tatar qızları uyatqan ğorurlıq buldı. Eş şunda, soñğı yıllarda mäktäpne medal'' belän tämamlağan altı keşe arasınnan bişese tatar qızları ikän. Tuğan mäktäpläre bäyrämenä dip kilgän qızlar belän gäpläşep alırğa buldıq.

Dinara belän Gölnara mäktäpne ike yıl elek tämamlağannar Bügen Uralnıñ iñ yaxşı yuğarı uqu yortlarında belemnären däwam itälär. Qızlarnıñ üzläre äytüençä, tatar telen alar öydä, ğailädä sabıy çaqtan uq işetep üskännär. Alarnıñ küp kenä yäştäşlärenä xas bulmağança bik matur itep tatarça söyläşüläre bezne tağın da söyenderde.

Fäwiä Safiullina

Yekaterinburg

XS
SM
MD
LG