Monı ölkännär niçek qabul itte? 1nçe fevral’däge häm ğinwardağı yörülär arasında ayırma barmı? Televidenie tapşırularında 1nçe fevral’dä ölkännär bik qänäğät kürende. Pensionerlarnıñ ber öleşe aylıq bilet alıp yöri, ä ikençeläre, ällä nigä ber çıqqanğa 5 sum tüläp qaytu faydalıraq, dip belderä. «Tatar-inform» agentlığı xäbär itkänçä, taşlamalı aylıq biletlar bik az satılğan. 150 meñ danädän barı 18 meñe genä alınğan. Transport idäräse xezmätkärläre äytkänçä, ölkännär 200 sumnı canğa qaldırırğa tırışa häm aylıq biletnı alırğa telämi. Bu xaqta «Tatar-inform» agentlığı xäbär itä. «Azatlıq» radiosınıñ Qazan studiäsenä Qazannıñ Mäskäw rayonında yäşäwçe pensioner Nailä apa Ğalimova şaltırattı. Ul aylıq biletnı alırğa teli, ämma taşlama urınına birelä torğan aqçalarnı ul haman da ala almıy.Nailä xanım äytkänçä, 1nçe fevral könne ul bazarğa barıp qaytqan, trolleybustağı konduktor anı tülänmägän öçen açulanğan, aqça almawğa ışanmağan. Nailä xanım Galimova xezmät veteranı digän isemne yörtä. Anıñ süzlärençä, «Rusiä saqlıq bankı»nda xisap açu eşlären ul inde dekaber ayında uq tämamlanğan bulğan, ämma ğinwar häm fevral öçen dä aqçasın almağan. Banknıñ pensionerlar aqçasın niçek häm qayçan tüläw turında Bank xezmätkärlärenä möräcäğät ittek. Bank xezmätkärläre, Sotsial yaqlaw ministrlığınnan kilgän açqanı ikençe könne uq tapşırabız, dip belderdelär. Yäğni Qazan pensionerı Nailä Galimovanıñ taşlama urınına tieşle aqçasın almağanında banknıñ ğäyebe yuq, dip cawap birdelär. Sotsial yaqlaw ministrlığı xezmätkärläre, Qazan pensionerları belän şöğellänmibez, tulayım respublika buylap äytkändä, böten aqçalar da tüläp beterelgän, dip belderdelär. Ämma bu pensioner apa mäs’äläsen xäl itep qararğa wäğdä ittelär. «Azatlıq» xäbärçesenä, Qazan şähäreneñ sotsial yaqlaw idäräsenä şaltıratırğa kiñäş itelde. Bu idärä belän elemtägä kerä almadıq, şuşı oyışmadan da cawap alğaç, bu qisanıñ däwamın «Azatlıq»nıñ aldağı tapşırularında xäbär itärbez.
Bikä Timerova.
