Accessibility links

сишәмбе, 6 декабрь 2016, Казан вакыты 22:47

Tatarstan deputatları tantanağa qädär eşne beterep quydı


Tatarstanda töp säyäsi yañalıq bulıp, Tatarstan Prezidentın raslawğa äzerlek mäsäläse tora. Däwlät Şurası utırışında, Mintimer Şäymievnı Prezident itep raslaw mäs’äläsendä tawış birü - 25 martqa bilgelängän. Tawış birü näticäsendä şiklänüçelär yuq, inde wazifağa kerü tantanası da planlaştırılğan, qunaqlar çaqırılğan, tärtibe bilgelängän. Ul 25nçe martta, Säydäşev isemendäge konsertlar zalında bulaçaq. Älege çarada qatnaşu öçen, Tatarstannan saylanğan Duma deputatları, respublikanıñ çittäge wäkilläre, ere eşmäkärlär, şähär başlıqları çaqırılğan. Qunaqlar Qazanda cıyıla başladı inde.

Ä 24 artta Tatarstan deputatları cıyılıp, tantanalarğa qadär, qanunnar belän eşne beterep quyarğa buldı. Utırışta, cirle üzidarä turındağı qanun, mir sudyaların saylaw kebek mäsälälär qaraldı. Cirle üz idärä oyışmalarına saylawlar 25 sentäbergä bilgelände. Annan soñ, Tatarstanda cirle üz idärä oyışmaları eşli başlayaçaq. Tatarstan deputatlarınıñ statusı turındağı mäs’älä, ayıruça küp bäxäslär kiterep çığardı. Deputatlar, saylawçılar belän oçraşuğa baru öçen, transportnı buşlay birü, yäki birmäw, biletnı çiratsız alu turında da bik ozaq bäxäsläşte. Soñınnan, bu mäs’äläne qaldırıp torırğa buldılar. Älege utırışta şulay uq, Tatarstan Prokurorınıñ Tatarstan qanunnarına federal qanunnarğa turı kilmi dip, protest belderüläre dä qaraldı. Alarnı deputatlar, bik täfsilläp qaramıyça, iğtibarğa ğına alırğa buldı. Şunıñ belän bergä «Yäşlär turında»ğı respublika qanunı da qabul itelde. Anda Yäşlär eşläre ministrlığı üzeneñ wazifaların mömkin qädär kiñäytep, raslarğa tırıştı. Monı parlament räise Färit Möxämmätşin da bilgeläp ütte, ämma qanun şul kileş qabul itelde. Şunıñ belän Däwlät Şurasınıñ 12nçe utırışı tämamlandı. Ämma deputatlar äle taralmıy. Comğa köngä parlamentnıñ yaña utırışı planlaştırılğan. Anda äytkänebezçä, Tatarstan Prezidentın raslaw mäs’äläse qaralaçaq.

Säyäsi firqälär bu mäs’älägä qaraşın belderde. «Berdäm Rusiä» firqäse, «Tatarstan yaña ğasır» xäräkäte, xuplaw belderergä cıyına. Kommunstilar firqäse wäkilläre, törlese- törleçä bäyälär beldergännär ide. Ä fraksiä tulısı belän niçek tawış biräçäk, kommunistlar firqäse äle xäl itmägän. Däwlät Şurasınıñ comğa utırışında bezneñ xäbärçebez dä bulaçaq. Älege çaradan tulı reportajnı «Azatlıq»nıñ comğa tapşıruında işetersez.



Bikä Timerova.

XS
SM
MD
LG