«Yaña tatar pyesası» bäygeseneñ bıyılğısı yäş avtorlarnıñ iğtibarın cälep itü maqsatın quydı. Bäygeseneñ nigezlämäsendä iñ yaxşı pyesalar yarışında 35 yäştä qädär avtorlar qatnaşa ala dielgän ide. Yäş avtorlarnı nindi temalar borçıy soñ? Bäygegä täqdim itelgän 30-lap eşneñ küpçelege – mäxäbbät turında ide. Ä ädäbi romannı äsärne säxnägä quyu däräcäsenä citkerü, yäğni roman nigezendä yazılğan insenirovkalar bäygesendä olıraq, täcribäleräk avtorlar köç sınaştı.
Şuşı könnärdä, älege bäygegä yomğaq yasaldı häm ciñüçelärne büläkläw buldı. Tantana, xalıqara teatr könendä, Kamal teatrı binasında ütte.
Kiçäneñ berençe öleşeñdä, Mädäniät, sänğät akademiäse studentları köçläre belän, teatr tarixınnan küreneşlär kürsätelde. Şuşı yäşlär, bıyıl uquların beterep, Başqortstanğa, «Nur» tatar teatrına eşlärgä kitäçäk, dip iğlan itelde.
Kiçäneñ ikençe öleşendä, ciñüçelärne büläkläw çarası buldı. Pyesa yazuçı yäş avtorlarnıñ 5se – diplomnar häm qimmätle äyberlär belän büläklände. Tağın 5 yäş yazuçı bäyge lawreatları isemenä layıq, dip tabıldı. Jyuri äğzäläre, täqdim itelgän barlıq äsärlärne uqıp çıqqan, bäxäsläşkän, bäyä birgän häm büläkne birergä dä säxnägä çıqtı.
Ğalim Ğali Arıslanov mäsälän, laureatlarnı büläkläde. Alar arasında yäş jurnalist, Rawil Sabir bar ide. Ul «Zimfiräkäy, sıluım, appağım» digän säxnä äserne täqdim itkän bulğan. Tuqay sının alırğa dip säxnä mengäç, ul, märxüm rejisser Marsel Sälimcanovnıñ süzlären iskä aldı. İsän çaqta ul, yäş dramaturglar kilep, qultıq astında menä digän pyesa qıstırıp kererlär dip kötkän bulğan ikän. Xäzer, yazğan äyberlärne kütärep, teatrğa kerärgä bula, dide Rawil Sabir. Yäş avtorlar Railä Moxsinova häm Zöxrä Fatıxova da säxnä äsärlären birep, bäygeneñ bu öleşendä ciñgän. Büläklänüçelär arasında Başqortstannıñ Bişbüläk rayonınnan Möxärrämova Dinä dä bar ide. Dinä xäzer Ufada yäşi häm «Atna» gäzitendä jurnalist bulıp eşli. Dinä Möxärrämova bäygegä «Teşlängän alma» digän äsären täqdim itkän. Şuşı alma, mäxäbbät tarixın häm xatın-qız yazmışın surätläwçe obraz bulıp tora, dip añlattı avtor. Jyuri iğtibarına ber yulı 5 äsärne täqdim itkän avtor, mädäniät sänğät akademiäse studentı - İlgiz Zäyniev buldı. Anıñ ber genä äsäre, «Ay qızı» digän pyesası belän ciñü yalağan. Lawreat isemenä layıq bulğan yäş avtorlarğa 50meñlek büläklär birelde. Häm aktivlığı öçen, İlgiz Zäyniev Mädäniät ministrlığınıñ maxsus büläge, notebook, zamança kompyuter birelde. Älege büläkne student yegetkä ministır İldus Tarxanov tapşırdı.
Bäygeneñ ikençe öleşendä, Mäxmüt Ğäläwneñ 2 äsäre nigezendä iñ osta instenerovka eşlägän dramaturglar isemnäre ataldı. Mäxmüt Gälläwneñ «Möxäcirlär. Bolğançıq yıllar.» romanın säxnägä quyu, pyesağa äyländerü avtorlarğa awır bulğan. Bäygegä barı 6 ğına äsär täqdim itelgän. Alarnıñ 2se yarıştan töşerelgän. Tağın 2 avtor, qızıqsındıru büläkläre belän bilgeläp ütelde. Ä Fanawil Ğaliev häm İltizär Möxämmätğaliev bäygeneñ şartlarına cawap birüçe iñ yaxşı äsär yazuçılar dip, ciñüçe iteç iğlan itelde. Alarğa bäyge büläge itep 100meñ sum bireläçäk. Kiçädä, «Yaña tatar pyesası 2005» digän yaña bäygeneñ başlanuı iğlan itelde. Anıñ töp janrları - muzıkal drama häm komediä bulaçaq.
Bikä Timerova.
