Qazannıñ näq üzägendä, İrek mäydanında, berniçä kön aldan, mäydannıñ ike yağında da urındıqlar quyıldı, xärbilär kön sayın, öyränülär ütkärde. Bäyrämgä äzerlekneñ barışı mäğlümat çaralarında kiñ yaqtırtılıp bardı. 8nçe may kiçendä, televidenie kanalları ğadi qazanlılarnı paradnı qararğa çaqırıp qaldı. Qazanlılar kilde, ämma timer kirtälärgä tap buldı. İrek mäydanı, 4 yaqlap militsiä belän äyländerep alınğan ide. Saqlanu çaraları ğädättägedän qırısraq buldı. Mäydandağı urındıqlarnı alırğa tieşle veterannar häm alarnıñ tuğannarı, maxsus çaqırular belän genä kertelde. Bar keşene dä, xättä keçkenä biüçe balalarnı dä, kiemnären, äyberlären qapşap kerttelär. Ğadi tamaşaçılar, töp bäyräm çaraları barğan mäydannan 100 metr yıraqlıqta, timer kirtä aldında qaldı. Çäçlären ködrälätkän häm lälä çäçägen kütärep kilgän ber qız-bala, yılar xälgä citkän ide. Anıñ apası söylägänçä, qızçıq kiçen televizor qarap, bik tä’sirlänep, 9 may könne veterannarğa çäçäk birergä telägän. Ämma, kilep çıqmağan. Yulnı yapqan militsiä xezmätkärläre belän, äbilär dä kilep söyläşep qaradı.Ämma näticäse bulmadı. Militsiälelär, iminlek taläpläre şundıy, dip itäğätle cawap birergä tırıştı. İrek mäydanına ikençe yaqtan, Puşkin uramınnan, yaqınraq kilep buldı. Ämma ğadi qaznalılar öçen qaralğan urın bik tar ide, 2-3 maşina ütärlek aranı keşelär tığızlap tutırdı. Arttağılarğa, mäydannan tawışlar ğına işetelde. Yaqındağı binanı täräzä töplärenä, uramda beraz kütärelep torğan urannarğa, çüp çiläge östenä menep qaradı yäşlär.
Şuşında keşelär belän söyläşep aldıq. Räncü tulı apalar, bäyrämgä yaqınraq kilä almawına ükeneç belderdelär. Yıl sayın şuşı paradqa, bıyıl ğına anı kürä almawın, belderde alar. Telefon-avtomat astında torğan abzıy, ätise kümelgän ğomumi qäber yanına, Piterburğa bara almawına, eçem poşa, dip xisläre belän urtaqlaştı. İrle-xatınnı, başqort keşeläre, ätiläre häm äniläre istälege itep, bäyrämgä kilüen belderdelär. İrek mäydanına yaqın kilergä tırışqan waqıt eçendä, bäyräm, ğäskärlär ütä torğan mizgelgä citte. Räsmi agentlıqlar xäbär itkänçä, Ciñüneñ 60 yıllığına bağışlanğan bäyräm tantanası, 200-läp veterannıñ mäydannan ütüennän başlanıp kitkän. Saqçılar, suğış frontları bayraqların kütärep, mäydannan uzıp kitkän. Annan soñ, Ciñügä bağışlanğan muzıkalı häm biüle kompozitsiä kürsätelgän. Bäyräm notığı belän Tatarstan Prezidentı veterannarğa möräcäğät itkän. Axırdan, mäydannan suğış çorı kiemnärennän xärbilär üzğan, Suvorov isemendäge, tank, artilerriya uçilişesı kursantları, eçke eşlär ministrlığı, ğädättän tış xällär ministrlığı ğäskärläre, yanğın sünderüçelär häm başqa xärbilär ütte. Parad retro-maşinalar kolonnası ütüe belän tämamlandı.Bikä Timerova
