Accessibility links

дүшәмбе, 5 декабрь 2016, Казан вакыты 01:34

Yañğır arqasında qayber awıllarda Sabantuylar ütkärelmäde


Respublikanıñ Ägerce, Aqsubay, Nurlat, Bawlı, Balıq Bistäse, Arça, Layış, Çirmeşän, Leninogorski kebek rayonnarda Sabantuylar görläp uzğan. Alarnıñ qayberlärendä yañğır yauıp uzsa da, bäyrämgä zıyan kitererlek bulmağan. Başqalardan ayırmalı bularaq Minzälä rayonında isä Sabantuyında kön bik matur bulğan. Älege rayonı gazetası baş möxärrire urınbasarı Färit Gıylemov:

Bezdä Saban tuyı kunelle uzdı. Aldınğı mexanizatorlarğa televizor, suıtqıç kebek büläklär tapşırıldı.

Qaydadır xalıq matur qoyaşlı köndä bäyräm itkändä, ikençe cirdä qoyıp yañğır yawdı. Şul säbäple, törlese-törleçä ışıqlandı. 4 iyün könne Biektawnıñ Çırşı awılındağı Sabantuy alanlıqta tügel, ä mäktäp qarşındağı mäydanda uzğan. Bua şähäreneñ üzendä milli bäyräm 5 iyün könne ütte. Yäkşämbe könne hawa torışı ayaz torğan. Ämma aldağı könne işep yañğır yawu säbäple, ippodromda atlarğa çabuı bik awır bulğan.

Sabantuy 4 iyüngä bilgelängän awıl-rayonnarnıñ kübese yañğırğa oçradı. Şul uq Buanıñ Yaña Tinçäle awılında yañğır bulğaç Saban tuyı mädäniät yortında ğına uzğan, ä köräş mäktäptä oyıştırılğan. Naratbaş awılı bäyrämne parkqa küçergän, Meşçeryaki awılında isä 10да başlanırğa tieş bulğan bäyräm, säğät köndezge berdä, yäğni yañğır tuqtağaç başlanıp kitkän. Qayber awıllarda yañğır yawsa da, bäyräm aldan bilgelängän urında uzğan. Sabantuyğa dip maxsus - yıraqtan qaytqan qunaqlar yañğır yawsa da, butıy-kälüşlär kiep bäyrämgä barğan. Leninogorskida da xäl näq Buadağı kebek bulğan. Şimbä, yäğni awıllarda Saban tuyı könne irtän yañğır yawğan, ä şähäreneke könne hawa torışı ayaz bulğan.

Apas rayonında, irtädän ük yañğır yawsa da Sabantuy uzdırırğa bulğannar. Terälep torğan, Qama Tamağında, bäyräm könen küçerü xäbäre işetelgäç, Apas xalqı da moña ömetlängän bulğan. Bolıt böten dönyanı qaplap alu säbäple, yañğırnıñ töşkä qädär betmäyäçäge añlaşılğan. Ämma citäkçelär ber äzerlängäç uzdırıp cibärüne qulay kürgännärder. Apas rayonı xakimiät apparatı citäkçese İldus Zinnätullin:

İrtädän uq yañğır yawsa da, säwdä rätläre tözelde. Xalıq küp kilgän ide. Yañğır qomaçawlamadı. At çabışları, uyınnar buldı.

Qama Tamağında apaslılardan ayırmalı bularaq, qunaqqa Tatarstan Däwlät Şurası räise Färit Möxämmätşin kilsä dä, Saban tuyı 8 iyüngä küçerelgän. Bu xaqta rayon xakimiät başlığı urınbasarı İldus Gıylmetdinov:

Tönlä ük yañğır yawu säbäple, bäyrämne küçerdek – 8 iyüngä. Xalıq peçängä çığaçaq kiläse yallarğa, şuña 8 könne quydıq. Färit Möxämmätşin kilep kitte. Xalıq cıyılmadı Sabantuyğa. Ul rayon belän tanıştı. Sabantuy bit ul qunaqlar öçen genä oyıştırılmıy.

Qama Tamağınnan tış Saban tuyları, yañğır yawu säbäple, Kuqmara, Älki, Baltaç, Saba rayonnarında küçerelgän. Bäyräm alarda 11 iyündä uzaçaq.

Landış Xarrasova

XS
SM
MD
LG