Böyek rus şağire Aleksandr Sergeeviç Puşkinnıñ tuğan köne Yekaterinburg şähärendä här yılnı bik zurlap ütkärelä. Şähär üzägendäge xalıq arasında “ädäbi kvartal” dip yörtelgän tınıç, matur skverlarınıñ bersendä, şağirneñ häykäle qarşında şiğer bäyräme uzdırıla. Bäyrämgä icat keşeläre, yazuçılar, şağirlär, jurnalistlar, cämäğät eşlekleläre häm şiğriät söyuçelär cıyıla.
Soñğı berniçä yıl eçendä biredä törle milli oyışmalar da qatnaşa. Dahi şağirneñ äsärlären törle tellärdä uqu ğädätkä kerep kitte. Bu yıl da böyek ädipneñ äsärläre rus, ukrain, gruzin, tatar tellärendä yañğıradı.
9 sıynıf uquçısı Nazlığöl İjguzinanıñ “Ruslan häm Lyudmila” äkiätennän özekne tatar telendä uquın cıyılğan xalıq tın qalıp tıñladı. Şiğerlärne Nazlığölneñ änise – Miñsılu xanım üze tärcemä itä ikän. Şiğriät bäyrämenä dip ul üze dä Puşkinnıñ “Solovey i roza”, yäğni, “Sanduğaç häm gölçäçäk” digän şiğeren alıp kilgän. “Küñelem tulğanda, yöräktä ilham bulğanda min şiğriätkä möräcäğät itäm, - di Miñsılu İjguzina, - Aleksandr Sergeeviçnıñ şiğerlären tatarça kürgänem yuq. Ä anıñ icatı bit äytep betergesez güzäl ahäñgä iä. Tatarça da bik matur kilep çığa, minemçä... Härxäldä, min cör'ät itep anıñ şiğerlären tärcemä itsäm, minem bik qırıs tänqitçelärem bar – irem häm balalarım...”
Aleksandr Sergeeviç Puşkinnıñ tatar telendäge şiğerläre tıñlawçılarnıñ küñelenä bik xuş kilde.
Könneñ bolıtlap kitüenä, yañğır sibäli başlawğa qaramastan, şiğriät bäyrämennän taralışırğa berkem dä aşıqmadı. Biredä Puşkin şiğerläre genä tügel, avtorlar başqaruında zamana şağirläreneñ äsärläre dä yañğıradı. Bäyräm kütärenke rux belän, bik küñelle bulıp ütte.
