Accessibility links

җомга, 9 декабрь 2016, Казан вакыты 05:01

Semberneñ “Tuğan tel” oyışması äğzaları säyäsi yünäleşlärne iğtibar belän küzätep bara


Sember ölkäseneñ “Tuğan tel” oyışması äğzaları, xalıq arasında eş alıp barudan tış, ilebezdäge wäzğıätne, säyäsi yunäleşlärne iğtibar belän küzätep bara. Ğomum Watanıbız kiläçägenä naçar tä'sir ixtimalı tudıruçı häm milli-mädäni mänfägat'lärne qänäğätländerügä kirtälär quyuçı qanunnar, ğämällär, küreneşlärgä üz mönäsäbeten belderep, täqdimnär kertep kilä.

Törle dairälärgä cibärelgän xat-möräcäğätlärgä törleçäräk mönäsäbät tä küzgä taşlana. Qayçaqta “Xatığız fälän cirgä tapşırıldı” digän cawap qına bula. “Tuğan tel” idäräseneñ yalğışlığın täfsilläp añlatqannarı da, qayber fikerlär iğtibarğa layıq, digännäre dä bar. Ä 2001 - 2004 yıllarda, general Şamanov waqıtında ölkä xakimiäte cawaplar belän belän waqlanıp mataşmadı. Töpsez qoyığa salğanday yuğala bardılar xatlar.

Şöker, xällär bu yaqtan da üzgärä kebek. “Tuğan tel” idäräse äğzaların Poselenielär turındağı ölkä qanunınıñ qayber añlaşılmağan yaqları tirän borçuğa salğan ide. Mäsälän, üzläre ük ayırım poselenie yasarlıq Qañlı häm Zur Çirkle awılların başqa awıllarğa quşu kebek ğäyre tabiği küreneşlärne kire qağuların sorap, Ölkä başlığı Sergey Morozov häm Ölkä Qanunnar çığaru cıyılışı räise Boris Zotov isemenä xatlar yullanğan ide.

“Tuğan tel” räise Mäxmüt Xäyrullin belän anıñ urınbasarın ölkä xakimiätenä çaqırğannar. Mäxmüt äfände bu oçraşu tä'sirläre belän büleşte.

“Kiçä bezne Ölkä administratsiäsenä Mixail Niqolayıwiç Yegorov şul xatqa cawap mäğnäsendä äñgämägä çaqırğan ide. Bu ğämäl üze genä dä xakimiätkä qarata uñay fiker häm räxmät xisläre tudıra. Döres, äñgämä barışında ike yaq ta üz fikeren nigezlärgä tırıştı. Urtaq fikergä kilep bulmadı. Älege zakonnarnıñ tatar awılları tamarın qorıtuğa yunälderelgän buluı belän xuca rizalaşmadı, qabul itelgän zakonnıñ döreslegen isbatlarğa tırıştı. Şulay da älege qanun nigezendä buldırılğan poselenielär çiklären üzgärtü mömkinlege ömetlär uyattı. Mixail Niqolayıwiç äytüençä, ägär, mäsälän, awıl xalqı ayırılıp çığu yäki başqa poseleniegä kerü telägen beldersä, anıñ fikerenä uñay qaraş kürsäteläçäk. Dimäk, xalıqnıñ üzennän dä tora. Äytik, Zur Çirkle yäki Qalda awılları üz poselenielären dä buldırırğa xoquqlı bulıp çığa.

Äñgämädä tağın ber ğar'länerlek närsä açıqlandı. İske Mayna rayonınıñ tön'yak öleşendä urnaşqan urıs awılları xalqı, saylawlarğa qädär ük, poselenie üzäge bulu xoquqın dawlap, ölkä citäkçelegenä möräcäğät itkännär. Häm şul uq Mixail Yegorov mondıy däğwälarnı tikşerep yörgän. Ä Çirkle, Tatar Saymanı, Abdulla, Tögälbuğa, Qañlı kebek awıllarda yäşäwçe millättäşlärebez närsä uylap yatqannar ikän soñ?

Şöker, dip äytik, älegä soñ tügel ikän. Awıl yazmışınıñ şul awıl xalqı qulında buluın da añlattı Mixail Niqolayıwiç. Menä şunısı öçen ayıruça räxmät ölkä administarsiäse xezmätkärenä”.

Bu - “Tuğan tel” räise Mäxmüt Xäyrullin buldı. “Ömet” gäzite möxärrire şuşı fikerlärne “Räxmät xatı” isemendä bastırıp çığarırğa wäğdä birgän. Eş räxmättä genä tügel. Döresräge, bötenläy räxmättä tügel. Xakimiät räxmätkä ällä ni moxtac da tügelder. Ägär bu xat basılıp çıqsa, anı uqığan millättäşlärebez, bälki üzlären çıbırqı belän qualanuçı kötüdäy xis itüdän arınırlar, üz xoquqların yawlarğa üzlärendä quät-köç, täwäkkällek tabarlar, dide Mäxmüt Xäyrullin.

“Azatlıq” radiosı, Ayrat İbrahim, Sember.

XS
SM
MD
LG