Samar ölkä duslıq yortında cäyge kanikullar aldınnan yomğaqlaw utırışı uzdı. Yegermegä yaqın milli üzäklärneñ citäkçeläre yılnıñ altı ayına yomğaqlaw yasadılar. Cämäğätçelek Şurasına östämä sorawlar da kertelgän ide. Eş şunda ki, Konstantin Titov gubernator itep bilgelängäç, yaña xökümät citäkçelären raslar aldınnan, beraz demokratiä uynap alırğa buldı. Konstantin Titovnıñ cämäğätçelekkä möräcäğätnamäsendä menä mondıy fiker yata. Fälän- fälän ministrlıqqa kemne täqdim itär idegez, häm inde şunda uq törle-törle törkemnär üzlärenä qulay şäxesne xuplap, xatlar yazıp, imzalar cıya başladılar.
Mäğärif ministrına kandidatlar isemlegenä bäyäne, älbättä inde, tik xönärmändlär genä bäyäli ala. Niçek inde kiçäle- bügenle Samara cirlegenä kilep milli- mädäni üzäk oyıştırğan koreyalı, tajik, çeçen, azerbaycan, qazax üzäkläre ministr qädär ministrğa xönäri qaraş belän kemneder täqdim itä alsın ikän? Utırışta " Tuğan tel" cämğiäte wäkile ğomum imza cıymıyça " här milli- mädäni üzäk üz isemennän genä fikeren gubernatorğa citkezergä tieş",- digän täqdim kertte, häm milli yulbaşçılar monıñ belän şunda uq rizalaştılar da.
Älbättä, mäğärif ministrınıñ kem buluı millätlär öçen barıber tügel. Bügenge mäğärif ministrı Yefim äfände Qoğan awıl mäktäplären ereländerüdä aktivlıq kürsätsä dä, tatar cämäğätçelegeneñ " mäktäplärgä xristian kul'turası sabaqları"n kertügä qarşı çığuın xupladı. " Tuğan tel" isemle Samara ölkä tatar cämğiäte gubernator Konstantin Titovqa cibärgän xatında mondıy yullar da bar: " Bez, tatar cämğiäte citäkçeläre, Samar ölkäseneñ mäğärif ministrı urındığında kiläçäktä dä Yefim Qoğannı qaldıru yağında, çönki Qoğan äfände aqıllı täqdimnärgä qolaq sala belä, şul uq waqıtta ölkädäge mäğärif çeltären Yevropa bieklegendä kütärergä tırışlıq kürsätä",- dielä xatta. Şamil Baxautdin, Samara.
