Accessibility links

шимбә, 3 декабрь 2016, Казан вакыты 03:35

Böyek Bolğarğa säyäxät qıluçılarnı Qazan qarşıladı


Qazannıñ Yılğa portında “Vladimir Zaysev” köymäse belän “Böyek Bolğar säyäxäte”nä çıqqan millättäşlärne qazanlılar qarşı aldılar. Bu mädäni çara Başqortstan häm Tatarstan arasındağı duslıq ceplären nığıtu maqsatınnan oyıştırılğan. Ufağa kilgän millättäşlärne Qazanda qarşı alu TR däwlät Şurası wäkilläre, mädäniät ministrlığı , Qazan mädäniät idäräse, Qazannıñ Säyeğaliev isemendäge mädäniät sarayı xezmätkärläre yärdämendä oyıştırılğan ide. Şulay uq bu bäyrämgä Tatarstan Yazuçılar berlege wäkilläre- yazuçılar , şağirlär , häm ğomumän çığışı belän Başqortstannan bulğan , xäzer Tatarstanda yäşägän millättäşlär dä kilgännär ide. Tatarstan mädäniät ministrı urınbasarı Ayrat Capparov çığış yasap säyäxätçelärgä häm qarşı aluçılarğa mädäniät ministrlığı isemennän täbrik süzlären citkerde. Annan soñ Tatarstan Yazuçılar berlegeneñ propaganda bülege mödire yazuçı Rädif Säğdi sälämläde.

Başqortstan yağınnan “Ramazan törki milli mädäni üzäge”citäkçese Marat Şaripov cawapladı.Ul bıyılğı 13 säyäxättä qatnaşuçılar belän tanıştırıp kitte. Tatarstanda alarnı härber şähärdä şulay matur itep qarşı alularına räxmätlären belderde. Başqortstan gimnı avtorı kompozitor Färit İdrisovqa süz birde. Ul üzeneñ räxmät süzlären äytep, ike tuğandaş xalıq arasında duslıqnı nığıtu maqsatın belderde. Säyäxätçelär arasında bu köymädä berençe tapqır kilgän, üze, çığışı belän Başqortstannıñ Baqalı rayonınnan bulsa da, babaları Tatarstannan bulğan, kükrägendä 56 orden medal'lär taqqan suğış veteranı tanılğan oçuçı, Dayan Murzin da bar ide . Ul üze yazğan kitabın Tatarstan prezidentı Mintimer Şäymievqa büläk itärgä Robert Miñnullinğa tapşırğanı turında äytte.

Ä Başqortstannıñ xalıq şağire Marat Kärimov üzeneñ yaña şiğeren alıp kilgän.Tanılğan cırçı Färidä apa Qudaşewa Qazandağı tä'sirläre belän urtaqlaştı.

Qazanda yäşägän millättäşlärneñ häm üzeneñ sağınu xisläre turında TR däwlät Şurası deputatı, şağir Robert Miñnullin söyläde.

Säyäxätçelär küçtänäçkä Ufadağı Kitap näşriätendä Ämirxan Yenikigä bağışlanğan kitap bastırıp alıp kilgännäre turında belderdelär.

Şulay uq Färidä Qudaşewanıñ yaña al'bomınıñ täkbir itü kiçäsen uzdırğannar. Häm anıñ bu al'bomın büläkkä alıp kilgännär. Ufada Roksana radiosında yazdırıp Qazannıñ 1000 yıllığına bağışlanğan radiotapşıru eşlägännär. Häm bu tapşıru inde efirda Ufa häm yaqın tirälärgä işetelgäne turında radio jurnalistVenera Gimazova söyläde.

Üze dä çığışı belän Başqortstannan bulğan, tatarnıñ kürenekle şağire Rädif Ğataş bu oçraşularnıñ icadi xezmättäşlekkä yoğıntı yasawına zur ömetlär bağlawın belderde.

Qazannıñ Yılğa portında Ufadan Böyek Bolğar säyäxätenä çıqqan millättäşlärne qarşı alu mizgelennän reportajnı äzerläde

Mälikä Basıyr .

XS
SM
MD
LG