Accessibility links

дүшәмбе, 5 декабрь 2016, Казан вакыты 11:40

Aqça eşliseñ kilsä, at çabışın qara


Qazanda tözelep betep kilgän at çabışı kompleksı ike milliard sumğa töşte. Häm ul 27 awgustta räsmi räweştä eşli başlayaçaq. Bu könne anda Rusiä prezidentı prizına at çabışları uzaçaq. Ni öçen, meñ yıllıq aldınnan bu at çabışı kompleksına şul qädär zur iğtibar birelä soñ , dip aptırawçılar da yuq tügel.

Eş şunda ki, monıñ işe sport kompleksı Rusiädä yuq. Şundıy däräcädägelärne Ğäräp Ämirleklärendä, Angliä, Honkong häm Fransiädä genä kürep bula. Närsädä şul qädär iskitärlek soñ bu at kompleksında. Küz aldına kiterik, mäydanı 90 hektar. Yäğni üze ber keçkenä genä şähärçek bu. Ul, ippodrom ğına tügel. Bu kompleksta törle däräcädäge restorannar, kafelar, diskätük urınnarı, at mäktäbe, xätta balalar baqçası da bar. Ä inde, at çabışın küzätep kenä utırırğa riza bulmıyça, aqça eşlärgä teläwçelär öçen bötenläy qızıqlı yañalıq bar. Totalizator dip atalğan bu nämärsä, ğömer baqıy at yaratqan tatarlar öçen yañalıq. At çabışı başlangançı , berär at isemenä, menä bu at ciñä dip aqça quyu häm ciñnän oçraqta aqçasın alu ul. Älbättä kübräk itep. Bu kompyuterlaştırılğan mexanizm. Qazandağı at sportı kompleksı da şuşındıy totalizator yärdämendä eşläyäçäk. Monıñ öçen şuşı stadionda bulu kiräk tügel. Mäsälän Amerikada yäşäp tä, totalizator yärdämendä at çabışı barışın qarap bula. İnde, tege yäki bu at öçen aqça quyu turında süz dä barmıy. Çönki, bu ğädäti eş sanalaçaq. Qazan at sportı kompleksındağı TATTO dip atalğan totalizator fransuzlarnıñ totalizatorlar sistemasına köylängän. Şuşı fransuzlar köylägän sistema arqılı, TATTO totalizatorı aşa Qazandağı at çabışların 260 fransuz ippodromında häm başqa dönya poçmaqlarında qarap bulaçaq. Dimäk, at çabışı yarışında aqçanı da dönyanıñ ällä küpme poçmağında salıp bula. Otıp ta bula. Döres salsañ älbättä. Yäğni, Qazan ippodromındağı berär yaratqan atığız öçen, sez, mäsälän, Amerikada berär Sem abzıy belän bergä qarap, yanıp-köep utıra alasız. Monnan tış, Qazanda da berniçä kafe, restoranda , ekrannar aşa, turı efirda küzätep baru, aqça salu, otu mömkinlege qaralğan. Şuşı TATTO totalizatorına 1200 keşe xezmät kürsätäçäk. Monnan tış, sistemanı tulı quwätenä eşlätkän oçraqta, 6500 keşe xezmät kürsätüe dä ixtimal.

Fransiädä şuşındıy totalizatorlar 8500 cirdä urnaşkan. 2004 yılda şular arqılı 8 milliard dollar aqça uzğan. Yäğni şul summada at çabışın yaratqan keşelär aqça salğannar. Otuçılar da küp. Mäsälän, bıyılnıñ mart ayında, Parijda, beräw, yaratqan atına 2.5 yevro aqça quyıp, bezneñçä 90 sumnar tiräse bula bu, 3 million, 414 meñ yevro aqça otqan.

Qazanda at çabışları här könne köndezge öçtän alıp, kiçke tuğızğa qädär totalizatorlar aşa kürsäteläçäk.

Şulay itep, at çabışı ğädäti waqıt uzdırudan tış, aqça eşläwgä dä äylänep bara. Här telägän keşe monı buldıra ala. Dönyada bu küptän şulay. İnde menä, Rusiädä dä berençe bulıp, Qazandağı at çabışı kompleksı şundıy mömkinlek tudırırğa äzerlänä.

Räfis Cämdixan.

XS
SM
MD
LG