Accessibility links

якшәмбе, 11 декабрь 2016, Казан вакыты 05:18

Qazannıñ 1000 yıllığı nindi çikläwlär alıp kilä?


Qazanda bu könnärdä, militsiäneñ 1000 yıllıqqa bağışlanğan öyränüläre bara. Şähär xalqı yäkşämbedä başlanğan, sişämbedä tämamlanaçaq, soñınnan tağın qabatlanaçaq öyränülär waqıtında yäşärgä öyränä. Bolar üzenä kürä, 1000 yıllıq bäyrämeneñ repetitsiäse. Yäkşämbedä, maşina yörtüçelär, yul inspektorlarınıñ ğädättägedän yışraq toruın häm san yağınnan da kübräk buluın kürä aldı. Düşämbe könne, şähär üzägenä şäxsi maşinalar kertelmäde, Qazannıñ üzäk uramnarı buşap qaldı. Bäyräm çaraları uzası İrek mäydanındağı binalarnı häm Kreml tiräsen militsiä xezmätkärläre äyländerep aldı. Uram buylap yörüçe keşelärneñ yulların yapmadılar. Ämma bäyräm waqıtında, andıy xällär bulırğa mömkin. Eçkä eşlär ministrlığı, Qazan xalqı häm başqala qunaqlarına yünältelgän maxsus qağidälär cıyıntığın çığarğan ide.

Xäzer şuşı qağidälär eşli başladı. Berençedän, üzegez belän şäxes tanıqlığın yörtergä kiräk. Şulay uq, xökümät maşinaları kolonnaları ütkändä, yul xäräkäte çiklänüenä äzer bulırğa. Bäyräm könnärendä şäxsi maşinalar belän, şähär üzägenä yörmäskä kiñäş itelä. Çit il watandaşları räsmi terkälmägän bulsa, Qazannan kitep toru sorala, dielä älege qağidälärdä.

Qazanğa başqa şähärlärdän kilüçe maşina yörtüçelär, qayber qıyınlıqlarğa oçrarğa mömkin. Tönge säğätlärdä, xäzerdän uq, Qazanğa kerü urınnarında, maşinalar tuqtatılıp, dokumentlar tikşerelä. Monı «Azatlıq» radiosı xäbärçesenä üzenä kürergä turı kilde. Başqa rayon nomerlı maşinalarnı şähärgä kertü buyınça, çikläwlär uq, dip cawap birdelär bezgä Eçke eşlär ministrlığında. Läkin bu ozaqqa tügel. Qağidälär cıyıntığında bu xaqta ber nindi süz yuq, ämma, eçke eşlär ministrı, avgust başında ütkärgän matbuğat konferensiäsendä bu xaqta küpmeder mäğlümat birgän ide. Bäyräm çaraları waqıtında, şähärgä kerü bulmayaçaq, çittän kilüçe maşinalarğa, şähär çitendä maxsus maşina quyu mäydännarı äzerlänä. Qunaqlarğa şuşında avtomobillären qaldırıp, maxsus avtobuslarğa küçep utırırğa kiñäş iteläçäk, dip beldergän ide eçke eşlär ministrı Äsxät Säfärov.

Bu tärtiplär avgustnıñ niçäsennän ğämälgä kerä başlıy, digän sorawğa tögäl cawap birüçe yuq. Eçke eşlär ministrlığındağı çığanaqlar, 20nçe avgusttan başlap, iminlek çaraları qırıslana başlıy dip äyttelär. 26 avgustta BDB illäre sammitı bula. Şunı oyıştıruda qatnaşuçı cawaplı xezmätlär, berniçä kön aldan Qazanğa kilä başlıy, dip xäbär itelä. Qazannıñ 1000 yıllığına qağılışlı sorawlarğa cawap birer öçen, eçke eşlär ministrlığı qaynar telefon liniäsen eşlätep cibärde. Anıñ nomerı (8432)912098.

Bikä Timerova.

XS
SM
MD
LG