Accessibility links

чәршәмбе, 7 декабрь 2016, Казан вакыты 15:34

Tatarstanda qoral belän xuşlaşalar


Tatarstanda bu könnärdä qoralsızlandıru aksiäse bardı. «Xuş qoral» operatsiäse bıyıl 10nçı tapqır ütkärelä ikän. istälekle büläklär häm aqça birep, militsiä, räsmi röxsätsez saqlanğan qoralnı tapşırığa çaqıra. Häm bu eş üz näticälären birä. Çärşämbe könne, «Xuş qoral» aksiäsenä yomaq yasaldı. Eçke eşlär ministrlığı bülekçälärendä terkälep, 40meñ au mıltığı häm 29 meñ gaz qoralı räsmi töstä birelgän. Qalğanı – qanunasın räweştä saqlana, dip sanala. Mıltıq häm pistoletlar quldan qulğa yörmäsen öçen, Tatarstan militsiäse 1995 yıldan başlap, üz teläkläre belän qoral tapşıru çaraların ütkärä. Anıñ öçen qızıqsındıru çaraları kürelä häm aqçalata büläk, qara bazardağı bäyälär belän, ber çamada bilgelänä, dip xäbär itelde çärşämbedä ütkän matbuğat oçraşuında. «Xuş qoral» operatsiäse näticäläre belän jurnalistlarnı eçke eşlär ministrlığınıñ wäkile İldus Äğläm ulı Xälilov tanıştırdı. Anıñ äytüenä qarağanda, räsmi terkälmiçä saqlana torğan qoralarnı tapşıru çaraları yıl sayın häm daimi räweştä alıp barılsa da, xalıqta qoral barıber bik küp. Bıyılğı aksiä turında söylägändä, militsiä xezmätkärläre ber qızıqlı tabıldıq turında maqtanıp äytä. Tanılğan tatar kompozitorınıñ tuğanı, ğasır başında çıqqan mıltıq tapşırğan. Kompozitornıñ iseme häm qayan aña mıltıq kilüe turında xäbär itelmi. Qoral tapşırğan keşe cawaplılıqqa tartılmıy. Ämma mıltıq bulsınmı, pistolet, patron häm başqa qorallar, cinayätlärdä qullanmadı mikän dip tikşerelä. 15 kön eçendä iske au mıltıqların häm başqa qorallarnı 422 keşe tapşırğan. Häm alarğa 40meñ sumğa yaqın aqça tülängän. Xökümät qararı belän, avtomat tapşırğan keşelärgä 2 meñ sum, au mıltığına 1meñ, şarlatqıçlarğa 1500, qul belän eşlägän qorallarğa 500 sum tülägännär.

Şulay 15 kön eşendä , 200dän artıq au mıltığı, 1 avtomat, 11 pistolet häm revol’ver, 138 gramm trotil, 13 granat, 1 kilodan artıq darı tapşırılğan. Bu çara beläklär birü belän barğanğa kürä, qayber keşelär, qorallar tapşırıp aqça eşlägän. Mäsälän, Aqtanıştan ber eşmäkär, 1914 ylğı karabin, au mıltığın häm 50 parton, tağın ber aqtanışta yäşäwçe keşe gaz pistoletın tapşırğan, öçençe ber abzıyda 60nçı yıllarda çıqqan mıltıq, patronnar häm granatalar bulğan. Tübän Kama rayonında berqaya da terkälmägän avtomat tabılğan, Qazanda - karabin, Yäşel üzändä - revol’ver, ä Sarmanda au mıltığı röxsätsez saqlanğan bulğan. Bu keşelärgä qorallar qayan kilgän, digän sorawğa, küpçelege – taptıq, dip cawap birä ikän. Militsiä xezmätkärläre, Tatarstanlılarğa möräcäğät itep, tabılğan, babalardan miras itep qalğan qoral bulsa, anı, daimi räweştä militsiägä tapşırırğa bula, dip belderä. Sezgä anıñ «Xuş qoral» dip yazılğan kiem büläk itäçäklär.

XS
SM
MD
LG