Bäyrämdä Tatarstan Yazuçıları berlege räiseneñ urınbasarı Şahinur Mostafin da qatnaştı. Ul Tatarstan Yazuçıları berlege, Bötendönya Tatar kongressı häm İlbaşı Mintimer Şäymiev isemennän täbrik süzläre häm räxmät xatları tapşırdı. Cirle xakimiät isemennän dä Lena xanımğa Räxmät xatları tapşırıldı.
Älbättä inde, yubiley çaralarında maqtaw süzläre - ğädäti küreneş. Şağiräneñ qälämdäşläre üz täbriklären şiğri yullar belän citkerdelär. Cirle avtonomiä küptän tügel üz yazuçılarıbız öçen yaqtaşıbız Gabdelcabbar Qandalıy isemendäge maxsus premiä buldırğan ide. Berençe şundıy büläk İdelbikägä tapşırıldı. Kiçäne cirle sanduğaçlarıbız Älfiä Ramazanova, Rimma Möxämmätcanova, Alsu Salaxova, Rinat Sadıykov İdelbikä süzlärenä yazılğan cırlar belän bizädelär.
Tağın şunı äytergä kiräkter. Şağirägä yubilee belän Tawlı Altay respublikasınıñ parlamentı räise İğor Yaimovnıñ qotlaw xatı da tapşırıldı. Monısı da ğäcäp tügel: anda İdelbikäneñ qızı şağirä häm rässam Liliä yäşi. Bu qız ul yaqlarda tanılğan şäxes ikän. Berençedän, respublika külämendä abruylı tabib ul. Anıñ räsemnäre cirle muzeylarda urın alğan. Mädäni çaralar da yış qına Liliä Yosıpova qatnaşlığında uza, di. Üzeneñ häm äniseneñ urısçağa tärcemä itelgän şiğerlären tamaşaçı bik tä cılı qabul itälär, di. Älege bäyrämdä dä anıñ änisenä bağışlanğan şiğri kompozitsiäse tirän tä''sirle buldı.
Çulpan Firğalieva, Sember
