20 avgust şimbä könne irtä belän sänğät söyuçelär Qazannıñ Yılğa portınnan teploxodlarğa utırıp Yuğarı Oslan rayonı Qızıl Bayraq awılına yul tottılar.
İdelneñ sul yağı yarında urnaşqan Qızıl bayraq awılı tatar xalqınıñ söyekle kompozitorı Salix Säydaşevnıñ yal itü urını bulıp sanala. Bu mäydanda anıñ istälegenä zur märmär taştan quyılğan monumentqa berketelgän taqtada tatar xalqınıñ ataqlı şağire Rawil Fäyzullinnıñ Säydäşkä bağışlanğan poemasınnan yullar bar: “Yıllar kitä, ozatıp cır qala, çayqala, ayqala, İdeldä ay qala ” Konsert aldınnan kilgän qunaqlar Säydäşkä çäçäklär salıp baş idelär.
Bu mädäni çara “Säydäşstanğa säyäxät”digän isem astında Ğ.Kamal teatrı citäkçese Şamil Zakirovnıñ initsiativası buyınça 2000 yıldan başlanıp, yıldan yıl kübräk sänğät ähelläre häm sänğät söyüçelär qatnaşlığında, bıyıl inde menä 6 tapqır ütkärelä.
Bıyılğı mädäni çaranı açıp cibärgändä Tatarstannıñ Premyer-ministrı urınbasarı, mädäniät ministrı Zilä Wälieva bu zur bäyräm belän tamaşaçını qotlap üz çığışında bolay dide: Audio
Yuğarı Oslan rayonı xakimiätı urınbasarı Aleksandr Prostatov, Ğ.Kamal teatrı citäkçese Şamil Zakirov, Tatarstan Kompozitorlar soyuzı räise Räşit Kalimullin, Tatarstan Yazuçılar Soyuzı räise İlfaq İbrahimov, üz çığışlarında Säydäşneñ ruxı, bügenge tormıştağı anıñ ähämiäte turında äyttelär. Audio
Bıyılğı “Sänğät bäyräme”neñ konsert programması Röstäm Abyazov citäkçelegendäge Tatarstan däwlät simfonik orkestrı başqaruında Sälix Säydaşevnıñ ataqlı ğäskärlär marşı belän başlanıp kitte.
Bıyılğı konsertnı bilgele cırçı İdris Ğaziev häm Liliä Appakova alıp bardılar . Konsertta Zilä Sönğatullina , İdris Ğaziev, Rezeda Galimova, Emil' Cäläletdinov, Miñğol Galiev, Rafael' Säxäbiev, Naciä Terkulova, İskändär Biktahirov, Liliä Göbäydullina, İlşat Väliev, Gölnara Murziewa, Nail Äyupov, Xämdünä Timerğaliewa , Röstäm Zakirovlar Sälix Säydaşevnıñ äsärlärennän cırlar başqardılar. Tatarstan däwlät simfonik orkestrı Qazan şähäreneñ 1000 yıllığına bağışlanğan Almaz Monasıypovnıñ “Uvertyura” sın uynadı. Ğosman Sadä üzeneñ şiğeren söyläde.G.Qamal teatrı artistları Sälix Säydäşevnıñ muzıkası qullanılğan spektakl'lärdän özeklär uynadılar.
Qazannan Sälix Säydaşevnıñ xaqında istälekläre belän anıñ ulı Al'fred Säydaşev belän Asiä Säydaşewa, häm alarnı kürep belgän Mansur Mäksütov belän anıñ turında kitap yazğan Salix Şämovlar urtaqlaştı.
Bu Säydäşstanğa säyäxätkä kilgän tamaşaçılar arasında Qazannıñ 1000 yıllıq bäyrämenä Avstraliädän qaytqan , İrek Ğarif tä , babaları Arça yaqlarınnan bulğan Nixat Yuniç, Qıtayda 1939 yılda tuıp üsep , 1981 yılda Avstraliägä kitkän Färmüdä Allayarova da , 1944 yılda Qıtayda tuıp üsep, Qıtay däwlät milli Ansambleneñ 400 uyğur keşese arasında 20 yıl eşläp, 1985 yılda Avstraliägä kitkän artistqa, inde layıklı yalda bulğan, Gölsara Ğaziz dä bar ide.Tatarlarnıñ nindi cırların cırlıysız digän sorawğa ul “Ğaliäbänu” nı cırlap kürsätte.
Häm dä ätise belän aralaşqanın 7 yäşendä kürep belgän, yäş waqıtında Sälix Säydaşewnıñ üzen “Naemşçik” dramasın tatar teatrında , xäzerge K.Tinçurin teatrında quyğanda, üze orkestrnı citäklägän mizgelen işetkän Äminä Kayumova, anı soñğı yulına ozatuda qatnaşqan Zahit Kayumov häm Sälix Säydaşewnıñ awıldaşı , motorlar tözü berläşmäsendä jurnalist bulıp eşläwçe Wäsilä Räximova , tatar teatrı artistı, Ämirxan Yenikineñ “Göländäm tutaş xätiräläre” digän äsäre buyınça töşerelgän televizion spektakl'dä Sälix rolen başqarğan Räsim Säläxov ta Azatlıq radiosına üzläreneñ istälekläre belän urtaqlaştılar.
Mälikä Basıyr Qazan.
