Accessibility links

якшәмбе, 4 декабрь 2016, Казан вакыты 09:10

Sverdlovski ölkä mädäniät ministrlığı tatar mädäniäte buyınça ğämäli seminar oyıştırdı


Küptän tügel Sverdlovski ölkäseneñ Krasnoufim şähärendä “Tatar xalıq icatı: ğöref-ğadätlär häm zaman” dip atalğan ğämäli seminar oyıştırıldı. Seminarnı milli mädäniät belän hönär’ şöğellänüçe keşelärgä praktik yärdäm kürsätü maqsatı belän Sverdlovski ölkä mädäniät ministrlığı oyıştırdı. Biregä tatar awılları klub xezmätkärläre, milli-mädäni klublar häm tatar icat kollektivları citäkçeläre çaqırılğan ide.

Seminarda vokal, xoreografiä, säxnä kul'turası, milli kiemnär buyınça praktik däreslär birelde. Däreslärne “Kügärçen” ürnäk balalar ansamble citäkçese Railä İbrahimova, Krasnoufim mädäniät yortı metodistı Svetlana Solov'yeva, ölkä fol'klor yortı xezmätkäre Svetlana Kuçevasova häm başqalar alıp bardı. Seminar barışında Äçit rayonınıñ Gäynä awılında häm Krasnoufim rayonınıñ Urta Boğalış awılında praktik däreslär uzdıru da qaralğan ide. Gäynä awılı klubında “Näwrüz” bäyräme oyıştırıldı. Ä Urta Boğalış mädäniät xezmätkärläre bik matur itep “Qaz ömäse” muzıkal' küreneşen säxnägä quydılar.

Seminar barışında qatnaşuçılar ber-berse belän täcribä urtaqlaştılar. Ğomumän alğanda, oyıştıru yağınnan da, däreslärdän dä bar da bik qänäğät qaldılar. Kiläse seminarlarğa niçek äzerlänergä soñ, digän sorawğa üzlären qızıqsındırğan temalarnı äyttelär.

Alapayıvski şähärennän “Çulpan” isemle balalar ansamble citäkçese Naciä Safiullina kiläse seminarlarda tatarça söyläşä belmägän balalar belän eşläw alımnarı qaralsa ide digän teläk belderde. Söyläm telen belmägän, añlamağan balalarnı cırnı, köyne işetergä genä tügel, telne yaratırğa da öyrätergä kiräk.

Naciä xanım rus qalasında üskän balalar belän inde küptän eşli. Ksyuşa Ryavkina digän rus qızın çın tatarça itep cırlarğa da öyrätkäne bar anıñ. Anıñ urtaqlaşırlıq täcribäse citärlek. Naciä xanım fikerençä, rus moxitendä tärbiälängän tatar balaları öçen iñ uñay yoğıntını tarixi watanıbız bulğan Qazan şähärenä säyäxät yasıy. Ğädättä balalar Qazannan qanatlanıp, telne yaratıp, üzlären çın tatar itep sizep qaytalar, di ul. Şuña kürä tatar ansambl'lärenä yörüçe balalarnı kümäk räweştä cäyge yallarda Qazanğa cibärü mömkinçelege kübräk bulsın ide, digän teläk belderde.

Seminarda qatnaşuçılar şundıy näticäle, faydalı çara oyıştırğannarı öçen mädäniät ministrlığı xezmätkärlärenä olı räxmätlär belderep taralıştılar.

Fäwiä Safiullina,Yekaterinburg

XS
SM
MD
LG