Accessibility links

пәнҗешәмбе, 8 декабрь 2016, Казан вакыты 05:13

Qazanğa bernçe "töyerle" säfär


Başqortstannıñ Kümertaw şähärendä yäşäwçe İnzilä xanım belän ulı Röstäm Kilsinbayıwlar Qazanğa berençe tapqır kilgännär. Millättäşlärebezgä Qazan bik nıq tä'sir itkän. Qol Şärif mäçete, Söyembikä manarası, Altın Urda tarixın çağıldırğan Ermitaj berkemne dä, alarnı da bitaraf qaldırmağan. Yaña tözelgän metro, milli teatrlar häm meñellıq tarixi başqala Kümertaw millättäşlärebez öçen zur tabış bulğan.

Läkin qaytıp barğanda, millättäşlärebezneñ küñele beraz qırılğan. Qazan eçendäge Ämät stansiäsen uzıp barğan Qazan-Ufa poyezdınıñ täräzäsenä zur taş ırğıtılğan. Şöker, taş eläkkän kupeda ber keşe dä bulmağan, ä kürşedäge kupe kümertawlılarnıqı. Täräzäne watıp kergän taş, älbättä, passajirlarnı qurquğa salğan. Poyezd xezmätkärläre äytüençä, mondıy ğälämätlär elek yış bulğan. Soñğı aralarda ğına poyezd täräzälärenä höcüm itü bik küzätelmägän.

Älege mäs’älägä beraz açıqlıq kerter öçen “Azatlıq” xäbärçese transport militsiäsenä möräcäğät itte. Militsiäneñ baliğ bulmağannar belän eşläw bülege räise Aleksandr Kvaşnev söyli

Poyezdlarğa taş atular - zur problemalarnıñ berse bulıp qala. Çönki bit timer yullarnıñ kübese şähär eçennän ütä. Bıyıl ğına poyezdlarğa 68 tapqır mondıy höcümnär yasalğan. Şularnıñ bersendä passajir zıyan kürgän. İñ yış höcüm itelgän rayonnar - Därwişlär bistäsendäge häm Yäşel Üzän timer yulı.

Aleksandr Kvaşnev äytüençä, mondıy höcümnärne nigezdä yäşlär oyıştıra. 13-14 yäştän alıp, 18gä qädärge yäşlärneñ eşe bu. Profilaktik çara bularaq militsiä xezmätkärläre mäktäp uquçıları belän söyläşülär, añlatu eşen alıp baralar. Läkin bu ğına citmi, çönki baliğ bulmağan balalarnıñ mondıy xataları öçen ata-analar üzläre cawap tota.

Qazannı kürergä kilgän meñärlägän mosafirlar arasında, näq menä kümertawlılar şundıy oçraqqa yulığu- matur xäl tügel anısı. Älbättä, beraz käyefläre töşsä dä, säfärçelär, Qazannan tulayım bik qänäğät kitkännär.

Al'bina Zäynulla

XS
SM
MD
LG