Accessibility links

Кайнар хәбәр

Pakıstanda parlament saylawı buldı


Pakıstan xalqı bügen parlament äğzälären saylaw öçen tawış birde. Saylaw oppozisiä başlıqlarınnan Binäzer Bhuttonıñ yaqınça ike ay elek intihar höcümendä üterülüennän soñ kiçekterelgän ide.

Bügen töp köräş, oppozisiä partiäläreneñ Möşärräfkä qarşı tora alırlıq ber premyernı bilgeläw öçen kiräkle bulğan küpçelek tawışnı yawlarlıq wäkellären mäcleskä kertü mäsäläse tora.

Bügen Pakıstannıñ kön tärtibendä parlament saylawı bar. Xäyer, küptännän kötelgän bu saylaw köne äle citkänçegä qadär saylaw aldı çaralarında küp keşe hälaq buldı. Başta oppozisiä başlıqlarınnañ Binäzer Bhutto belän bergä 100lägän keşe ülde. Şimbä könne genä, ilneñ tönyağında barğan saylaw aldı çaralarında da kimendä 50 keşe ülde.

Şuña bügen saylaw barışında iminlek mäsäläsenä ütä iğtibar birelde.

Qaraçi şähärendäge ber saylawçı, bolay di:

“Saylaw il külämendä tınıç uzar dip ışanabız, İnşalla bu eş qazasız-bälasız tämamlanır.”

Bügen iminlekne urnaştıru öçen 80 meñ nığıtılğan polisiä xezmätkäre saylaw üzäklärenä urnaştırıldı.

Mäclestäge urınnar öçen köräş qızu bara.

Oppozisiä başlıqları, bu saylawnı 1999 yılda xaqimiätkä kilgän Möşärräf belän köräş öçen yaxşı ber forsat bularaq bäyäliy. Monnañ elek, Möşärräfneñ köçlärne büleşüdän baş tartuı belän oppozisiäneñ tırışlıqları yuqqa çıqqan ide.

Bügenge saylawda ike zur soraw kön qadağında tordı.

Märxümä Bhuttonıñ partiäsenä bulğan xörmät, saylawda bu partiäne berençe bulıp çığara alırmı?

Ägär dä bu sorawnıñ cäwabı äye bulsa, ul çağında Pakıstan xalıq partiäse Möşärräfkä qarşı 2. zur oppozisiä partiäse elekke premyer Nawaz Şärifneñ Pakıstan möselman berlege partiäse belän berläşer dip farazlana.

Läkin Möşärräf aldına çığar öçen oppozisiä partiäläreneñ mäclestäge 272 urınnı aluı şart. Yäğni 3tän 2 öleşeñ. Ägär berläşä alsalar, soñınnañ alar premyerne bigeläyäçäk.

İkençe zur soraw isä bügen bulaçaq saylawnıñ ğadel ütüe mäsäläse ide.

Pakıstan saylawında bu yulı - yañalıq, 20 meñ küzätüçe tawışlar sanalğanda küzätep tordı. Küzätüçelär ğadel häm irekle saylaw çeltäre tarafınnañ idarä itelä.

Waşiñton Möşärräfneñ Pakıstanda äl-Qaidäğä qarşı alıp barğan çaraların xuplıy. Läkin Waşiñton yağı şul uq waqıtta mömkinlege çıqqan waqıtta bu xärbi çaralarnıñ citeşsezlegen telgä ala häm Möşärräfne ilne demoktratiäläşterergä dä çaqıra. AQŞ räsmiläre, barı tik xalıq tarafınnan saylanğan xaqimiät genä, xalıqnı ilneñ xärbi üzençälegen beterä alır dip bäxäsläşä.

Bügen saylawlarda näticä närsä bulsa da, İslamabadnıñ qabilä cirlärendä barğan iminlek çaralarına qarşı qaraş üzgärmiäçäk. Oppozisiä belän Möşärräfne böten qapma-qarşılıqqa qarşı ber närsä genä berläşterä, ike taraf ta Waşiñtonnıñ Pakıstanda terorçılıqqa qarşı eşçänlegen urtaqlaşa.
XS
SM
MD
LG