Amerikan gäzitläre bügenge könne "xälitkeç sişämbe" dip atıy. Beryulı 4 ştatta, şul isäptän, Texas häm Ohioda kebek möxim ştatlarda, berençel saylawlar ütäçäk.
Noyäber ayında bulaçaq prezident saylawda respublikannarnı kem wäkillek itäçäge inde mäğlüm bulsa, demokratlar yağında Hillary Clinton belän Barack Obama arasında qızu köräş bara.
Küzätüçelär fikerençä, bügenge tawış birü Hillary xanımğa anı quıp totu öçen soñğı forsat bulıp tora.
Köräş kliplar telendä bara
Uzğan atna Clinton törkeme saylawçını üz yağına awdaru öçen televideniedä yaña klip äyländerä başladı. Yartı minutlıq yazmada tön urtasında berär törle nizaq tusa, Hillary xanım anı üz östemä alam dip ışandıra.
"Säğät irtänge 3, sezneñ balalar tämläp yoqlıy. Aq Yortta telefon şaltırıy. Dönyada närsäder bulğan. Telefonnı kem alaçağın sezneñ tawış xäl itä. Ul dönya citäkçelären, xärbilärne inde belgän, sınalğan, qurqınıç dönyada citäkçelek iterdäy keşe bulsınmı? İrtänge 3, sezneñ balalar tämläp yoqlıy. Telefonnı kem alsın?"
"Min Hillary Clinton, mäsäläne üz östemä alam", - di Hillary Clinton.
Obama törkeme ozaq köttermäde. Näq şundıy 30 sekundlıq cawap äzerläde. Bu cawap Obamanıñ älegä qädär iñ köçle adımı sanala.
Säğät irtänge 3, sezneñ balalar tämläp yoqıy. Aq Yortta telefon şaltırıy. Dönyada närsäder bulğan. Telefonnı kem alırğa tieş? Ğiraq suğışına anıñ başınnan uq qarşı çığarğa batırlıq itkän keşe tügelme? Amerikağa çın yanawnıñ Ğiraq tügel, ä Äfğanstandağı Äl-Qaidä ikänen añlağan keşe tügelme? Dönya buylap tarala barğan atom qoralın awızlıqlarğa çaqırğan keşe tügelme? Qurqınıç dönyada döres qarar qabul itü möxim."
"Min Barak Obama, mäsäläne üz östemä alam", - di Barak Obama.
Clinton-Obama köräşe demokratlarğa zıyanğa
Bügenge tawış birü aldınnan Obama 100 delegat çaması östenlek belän alda bara ide. Ägär Clinton uñışqa ireşä almasa, ul yarıştan çığuın iğlan itergä mömkin digän farazlar bar.
Obama belän Clinton arasındağı köräş axır çiktä demokrat namzätneñ zäğiflänüenä kiterä, digän borçular da bar.
Respublikannarda namzät mäsäläse inde xäl itelgän diergä bula. Ul – senator John McCain. Anıñ köndäşläre yıraqta artta qaldı. McCainğa xäzer vitse-prezident tabası ğına bar.
Köräşer keşese bulmağanğadır inde, McCain demokratlar yarışın küzätä. İrtänge säğät 3 qıyssasınnan ul da çittä qalmadı.
"Ägär irtänge 3tä Aq Yortta telefon şaltırasa häm anı min alsam, belemem häm täcribämä kürä, iminlek nizağın xäl itü qararın qabul itü öçen min iñ äzerlekle keşe bulamdır. Soñğı 20 yılda ilebezdäge töp iminlek mäsälälären xäl itüdä min barısında da qatnaştım" dide John McCain.
Bügenge tawış birüdä töp iğtibar Texas häm Ohaida bulaçaq. Monnan tış saylawlar tağın Rhode İsland häm Vermontta ütäçäk.