Accessibility links

Кайнар хәбәр

Äfğan studentları protest belderä


Äfğanstan möselmannarı amerikan älämen yandıra
Äfğanstan möselmannarı amerikan älämen yandıra

Yäkşämbedä Äfğanstannıñ Nangarhar vilayätendä meñlägän student, İslamnı kimsetügä protest belderep, zur yulnı tomaladı. Daniä häm Hollanda älämnären yandırdı, "Daniä belän Hollandağa ülem" digän şiğärlär qıçqırdı.


2 yıl elek Möxämmät päyğambär başına bomba räweşle çalma uralğan ber karikatur bar dönya buylap möselmannarnıñ näfräten uyatqan ide. Bu karikatur avtorına höcüm äzerläwdä şiklänelgän 3 keşe qulğa alındı. Uzğan ayda Daniäneñ berniçä gäzite, rässamğa teläktäşlek yözennän, anıñ şul suräten qabat bastırıp çığardı.

Şuşı ayda Hollanda deputatı Geert Wilders izge Qorän kitabına tänqidi qaraşta torğan film çığarırğa cıyına.

Äfğan studentları bügenge qarşılıq çarasında möräcäğät qabul itte.

"Bez Äfğanstan xökümäten Daniä häm Hollanda belän diplomatik bäyläneşlärne özergä çaqırabız. Daniä häm Hollanda ğäskärläre Äfğanstannan çığarılırğa tieş. Bar dönya buylap möselman tuğannarıbıznı Daniä häm Hollanda mallarına boykot belderergä çaqırabız."

Äfğanstan xökümäte üze dä karikaturnıñ qabat bastırıluın İslamnı kimsetkän häm islamçı suğışçılarnıñ däräcäsen küpertkän ğamäl dip atadı. Taliban xäräkäte isä monı İslamğa qarşı suğışnıñ ber öleşe dip atadı.

Şimbä könne näq şundıy protest çarası Herat qalasında ütte. Protestçılarnıñ berse Möxämmät Äqbär İslamnı kimsetüçelärgä qarşı cihad başlarğaç çaqırdı.

"Bez päğämbärebezne kimsetkän härkemgä qarşı cihad iğlan itäçäkbez, aña qarşı protest belderäçäkbez" di Möxämmät Äqbär.

Uzğan atna şundıy uq protest çaraları başqala Kabulda ütte. 200läp deputat Daniä häm Hollanda xökümätlären İslamnı kimsetügä yul quymasqa çaqırdı.

Äfğanstan - Möxämmät päyğambär häm Qoränne kimsetü öçen ülem cäzası qaralğan islam respublikası.

Äfğanstanda NATO tınıçlıq saqlaw köçläre safında 1500-läp hollandalı häm 600dän artıq daniäle xärbi bar.

XS
SM
MD
LG