Accessibility links

Кайнар хәбәр

İldä nilär bulıp yata? - 24.III.2008


►Umartaçılar turistlarnı cälep itmäkçe ►Qazanda taciklar Näwrüzne bäyräm itte ►Amerika wä Tatarstan qız satuçılarnı totmaqçı






►Umartaçılar turistlarnı cälep itmäkçe


Rusiäneñ turizm agentlığı belän Tatarstan arasında kileşü imzalandı. Fermerlar da turbiznesnı üz itmäkçe. Başta bu yaña şöğelne umartaçılar sınap qararğa buldı.

Tatarstan -- Umartaçı
Tatarstan krestyän xucalıqları häm fermerlar assosiasiase belderüençä, isäpläre umartaların cäyge tabiğät qoçağına alıp çıqqan urınnarğa matur yortlar tözep turistlarnı bal häm yaña sawılğan söt belän sıylap cälep itü. Yaqın arada bu yaña tör eşquarlıqqa layıq bulırday umartalıqlar saylanaçaq häm Tatarstanda turizmnı üsterü programmasına kerü öçen söyläşülär dä alıp barırğa isäp itälär.

Umartaçılar idaräsenä turistlarnı törle ısullar belän cälep itergä teläwçe umartaçılar da yış kilä başlağan. Qayberäwlär umartalıqlarda maxsus yortlar tözep, anda yataqlar urnaştırıp, şulay uq sixätle hawa belän däwalaw urınnarı açu uyları barlığı turında beldergän. Bügenge köndä Tatarstanda 123000 umarta oyası bar. Ä umartaçılıq belän şöğellänüçelär yıldan-yıl arta bara. Anatolíy Ğamzov bügenge köndä anıñ yuğaltularğa duçar bulmağan iñ keremle biznes ikänlegen dä äytep uzdı.

Tatarstanda, ğädi genä itep äytkändä, älege yaña yünäleş- “bal turizmı” berençe adımnarın ğına yasarğa cıyına. Ğamzov äytüençä, Başqortstanda umartaları bulğan, tawlı matur tabiğät qoçağına turistlarnı cälep itä başlağannar inde. Alarnı tabiğät belän xozurlandırıp, atqa atlandırıp alıp kilälär, bal belän sıylıylar häm quray moñnarı tıñlatalar ikän.

Tatarstan räsmiläre belderüençä, uzğan yıl respublikağa 800 meñnän artıq turist kilgän. Bu san 2006 yıl belän çağıştırğanda 25 prosentqa artıq. Ä çit illärdän kilüçelär isä yaqınça 80 meñ dip belderä räsmilär. Küpçelege Germania, Törkiä, Quşma Ştatlar, Britania, İtalia, Fransia häm İzraildän.

--------------------------------------------------------------------------------------------

►Amerika wä Tatarstan qız satuçılarnı totmaqçı


AQŞ Ustisia ministrlığınıñ Rusiädäge daimi wäkile Terry Kinney.

Tatarstan -- Terry M. Kinney,
AQŞ Ustisia ministrlığı wäkile Terry Kinney Tatarstan belän keşe satuğa, oyışqan cinayätçelekkä qarşı köräştä xezmättäşlekkä ömetlänä.

Tatarstandağı keşe xoquqları buyınça cawaplı, eçke eşlär ministrlığı kebek oyışmalar häm AQŞ Däwlät departamentı belän bergäläp Qazanda ğämäli cıyın oyıştırdı. Ul “Keşelär belän säwdä itü, xalıqara oyışqan cinayätçelek belän köräş problemaları” dip atala. Cıyılışta qatnaşuçı, AQŞ Ustisia ministrlığınıñ Rusiädäge daimi wäkile Terry Kinney “Azatlıq” xäbärçesenä Tatarstan milisionerları belän xezmättäşlekläre daimi häm nıq buluın rasladı.

Tik ike ilneñ eçke eşlär, xoquq saqlaw sistemalır ike törle şartlarda eşläp öyrängän. Tradisialäre dä törle. Şulay buluğa qaramastan, Terry Kinney politseyskiylar häm milisionerlar arasında ällä nindi ayırma yuq di. Kinney Rusiä genä tügel, Tatarstan belän dä xezmättäşlek kiräk di. “Bezgä xezmättäşlekkä çiklär yuq. Şul maqsattan uzğan yılnı Tatarstandağı prokuratura häm eçke eşlär xezmätkärlären üzebezgä çaqırıp täcribä dä aldırttıq” , - dip söyläde ul. Terry Kinney ayırmalarğa qaramastan, xezmättäşlek öçen zur säbäp bar di. Ul soñğı distä yıllarda cinayätçelekneñ xalıqara berläşep häm kiñ itep eşli başlawın kürä. Şulay uq keşelärne ireksezläp yäki qollıqqa satu oçraqlarında ğädättä törle illärneñ cankisärläre berläşep qatnaşa. AQŞ xoquq saqlawçıları Rusiäne şundıy ğämällärgä qarşı bergä köräşergä dä çaqıra.

Xezmättäşlek yulı Könbatışqa da, Tatarstanğa da faydalı

--------------------------------------------------------------------------------------------

►Qazanda taciklar Näwrüzne bäyräm itte
Tatarstan Tabında milli rizıqlar mul ide
24 mart könne Qazanda tacik cämğeyäte zurlap Näwrüzne uzdırdı. Bäyrämgä üz cämğeyät wäkillärennän tış, Tatarstandağı yätim balalar, äbi-babaylar çaqırılğan ide. Alar öçen taciklar xäyriä aşı oyıştırdı. Barlıq qunaqlarnı zur qazanda peşerelgän pılaw belän sıyladılar.
XS
SM
MD
LG