Accessibility links

Rusiä Abzaxiä häm Könyaq Osetiä belän elemtäsen nığıta. Könbatış qarşı


Putin Gruziäneñ ike separatist töbäge belän tığızraq elemtälär urnaştırırğa çaqırdı. Könbatış moña tänqit belderde.


Çärşämbedä Rusiä prezidentı Vladimir Putin, üzeneñ xökümätenä Abxaziä häm Könyaq Osetiä räsmiläre çığarğan qayber dokumentlarnı tanırğa, bu respublikalarnıñ eşquarları häm oyışmaları belän elemtälärne nığıtırğa çaqırdı.

Bu belderü Könbatışta tiskäre reaksiä tudırdı. Yewropa Berlege "tirän borçılu" belderde. Quşma Ştatlar däwlät departamentı süzçese Sean McCormack anı "säyäsi xata" dip atadı. NATO general sekretare Jaap de Hoop Scheffer Mäskäwne süzen kire alırğa çaqırdı.

Rusiä tışqı eşlär ministrı urınbasarı Mixail Kamınin, maxsus belderü yasap, bu tänqitne kire qağırğa, Mäskäwneñ Gruziä belän nizağlaşırğa telämäwen añlatırğa tırıştı.

"Bezneñ Abxaziä häm Könyaq Osetiäğa qarata ğamällär Rusiäneñ Gruziä belän nizağlaşa başlawın añlatmıy. – dide Kamınin. – Bez, kiresençä, bu töbäkneñ üseşenä kirtä bulğan bar çikläwlärne alu yağında. Gruziä belän hawa häm diñgez yulların yañartu häm bezneñ başqa ğamällär moña dälil bulıp tora."

Mäskäwneñ bu añlatması räsmi Tiflisne tınıçlandıra almadı. Gruziäneñ iminlek şurası ğädättän-tış utırışqa cıyıldı. Tışqı eşlär ministrı David Bakradze Mäskäwneñ soñğı ğamällären "Abxaziä belän Könyaq Osetiäne basıp alu protsessın qanunlaştıru" dip atadı.

Pänceşämbedä Gruziä prezidentı Mixail Saakaşvili xökümätneñ ğadättän-tış utırışında, Gruziäne demokratik, uñışlı häm berdäm däwlät buludan berkem dä tuqtata almıy dide häm Rusiäne Gruziäneñ möstäqillegen wä bötenlegen şik astına quyğan qararların köçtän çığarırğa çaqırdı. Uzğan tön ozaq qına telefon aşa söyläşkänen iskärtep, ul qarlıqqan tawışı öçen ğafu ütende.

"Rusiäneñ bu provakatsiäle ğamälläre mine ğacäpländerä. – di Saakaşvili. – Yewropa Berlege, NATO häm bezneñ tarafdarlar, tarixta berençe tapqır moña qatı reaksiä belderde. Minemçä, bu Rusiä öçen dä kötelmägän buldı. Moña qädär xalıqara cämäğätçelek Mäskäwneñ här süzen yota bardı. Minemçä, kiçädän başlap, bu säyäsät üzgärä başladı."

Mäskäw Abxaziä belän Könyak Osetiäne räsmi tanımasa da, alar belän elemtäne nığıta bara. Anda yäşäwçelärneñ kübesenä Rusiä pasportları birelde, matdi yärdäm kürsätelä. Küptän tügel Mäskäw töbäkkä kertelgän iqtisadi çikläwlärne aldı häm respublikanıñ ikesendä dä yarım-räsmi ilçeleklär buldıraçağın belderde.

XS
SM
MD
LG