Putinnıñ Berlusconi belän oçraşuı İtaliäneñ möstäqil sanalğan Sadiniä utrawında ütte. İtaliäneñ iñ bay keşese, milliarder Berlusconi küptän tügel öçençe tapqır premier-ministr bulıp saylandı. Putin anıñ belän şuşı ciñüdän soñ oçraşqan berençe çit il citäkçese buldı.
"Putin monda kilep üzen çın dus itep kürsätte. – di Berlusconi. – Bezneñ mönäsäbätlär berqayçan da özelmäde. Rusiä bezneñ öçen bik möxim, bez neft häm gaznıñ 30%-tın alardan alabız."
Yewropanıñ küp kenä citäkçeläre Putin belän Berlusconinıñ yaqın mönäsäbätläre Berlekneñ Rusiägä qarata urtaq säyäsäten buldırğa qoma çawlıy digän borçılu belderä. Bu ike citäkçe Berlusconinıñ elekke premierlığınnan birle tanış. Xäzer alar inde premierlar sıyfatında xezmättäşlek iter dip kötelä.
Putin Sardiniädä Libiädän qaytışlıy tuqtaldı. Anda ireşelgän kileşülär arasında İtaliägä qağılğanı da bar. İtaliäneñ ENİ kompaniäse Libiädäge yatmaların Gazpromğa birä, anıñ urınına üzenä Rusiädäge yatmalarnı ala.
"ENİ kompaniäse Rusiä yatmalarına röxsät aldı. Gazprom andıy yatmalarnı başqa illärdä, şul isäptän Libiädä alırğa ömetlänä. – di Putin. – Urtaq proyektlar küp: yağulıq çığarudan alıp, ütkärgeçlär tözü, infrastruktura üsterügä qädär."
Matbuğat oçraşuında Putinğa Rusiä cämäğätçelegen borçığan ber şäxsi soraw da bilrelde. Ber jurnalist, sez xatınığız belän ayırılışqan häm tanılğan gimnast Alina Kabaeva belän öylänergä cıyınasız, digän süzlär döresme dip soradı. Putin, sez äytkännärdä ber xaqlı süz dä yuq dide.
Cämğiätneñ iğtibar üzägendä bulğan keşelärneñ tormışı belän qızıqsınırğa xaqı buluın tanısa da, Putin alarnıñ dä şäxsi tormışı bar dip, bu mäsälädä çama belergä çaqırdı.
İqtisad ölkäsenä qaytıp, Putin Aeroflot şirkäteneñ Alitalia kompaniäse belän söyläşülär yañartu telägen belderde.
Uzğan yıl Aeroflot Alitalianeñ 49.9% xissäsen alu niätennän baş tartaç, bu öleş belän Air France-KLM qızıqsına başlağan ide.
Brussel belän Mäskäw arasında waqıt-waqıt çığıp torğan kierenkelekne iskä alıp, Berlusconi Rusiä belän Yewropa Berlege arasındağı mönäsäbätlärne yaxşırtırğa çaqırdı häm bu uñaydan üzeneñ aradaşçılığın täqdim itte.