Belarusnıñ Könbatış belän araları moña qädär dä şäptän tügel ide. Dissidentlar utırtılğan. Amerikan diplomatları quıp çığarılğan. Yewropa räsmiläre inde küptän "diktatorğa" törtep kenä kürsätä.
Sişämbedä yıllıq yullamasın bäyän itkän çığışı waqıtında Lukaşenka Belarustağı säyäsi totqınnarnı da, alarnı irekkä çığarırğa çaqırğan Könbatışnı da mäsxärägä qaldırdı.
"İmeş böten dönya anı azat itergä taläp itergä häm Belarus xakimiäte bu basım astında işelep töşergä tieş, - di Lukaşenka. – Sin kemgä kiräk soñ, sine, ğafu itegez, bädräf qäğaze itep qullanalar, ä sin üzeñne kemgäder kiräk dip sanıysıñ. Bu inde ütkän zaman."
Añlaşıla ki, bu süzlär oppozitsiä citäkçese Aleksandr Kozulin isemenä äytelgän. Zamanında universitet rektorı, 2006 yıl saylawında Lukaşenkağa ottırıp, tawış birüdä xärämläşülärgä qarşı protest çaraları oyıştırğannan soñ ul törmägä utırtıldı.
Könbatış anıñ irekkä çığarıluın taläp itä. Miinskidağı säyäsät belgeçe Valery Karbaleviç fikerençä, Lukaşenka başqaların çığarsa da, Kozulinnı çığara almıy.
"Lukaşenka annan qurqa, irekkä çıqsa ul oppozitsiäne citäklär dip. Bu ber. İkençedän, Kozulin küptän tügel nomenklatura keşese ide. Lukaşenka Kozulin misalında nomenklaturağa sabaq birergä teli" di Valery Karbaleviç.
Yıl başında Mäskäw belän gaz bäyäse arqasında araları bozılğaç, Minski Könbatış belän bäyläneşlär urnaştırırğa tırışıp qaradı. Läkin gaz mäsäläse xäl itelde, Mäskäw arzanraq bäyä täqdim itte häm Lukaşenka yänä "şöreplärne qısa" başaldı.
Şuşı ayda ğına Belarus räsmiläre Minskidağı amerikan diplomatları sanın kimetergä taläp itte. Tağın berniçä oppozitsiä aktivistın törmägä ozattı. Sişämbe çığışında bu yäş aktivistlarğa da eläkte. Lukaşenka alarnı "keşe aqçasına inqıylablı uynap yörgän eşsezlär" dip atadı.
"Döresen äytkändä, min ul balalarnı qızğanam. Alarnı it urınına berençe safqa çığarıp bastırlalar. Säyäsai mänfäğätlären qayğırtuçılar alar artına qaça" di Belarus prezidentı.
Üzeneñ yullamasında Lukaşenka iqtisadnı yañartırğa, Belarusnı aldınğa illär arasına çığarırğa, 2011 yılğa xezmät xaqların ike tapqır arttırırğa wäğdä itte.
Läkin Rusiäneñ märxämätenä bäyle üzäkläşkän iqtisad belän bu maqsatlarğa niçek ireşep bulğanın, Lukaşenka üzeneñ çığışında açıqlamadı.