AQŞnıñ Rusiädäge elekke ilçese William Burns däwlät sekretareneñ säyäsi mäsälärdäge urınbasarı itep bilgelände. Ägär dä Senat xuplasa Mäskäwgä yaña ilçe bulıp John Beyrle kiläçäk.
Beyrleğa 53 yäş, üzeneñ säyäsi karyerasın ul 1983 yılda başlağan. Anıñ wazifalarınıñ berse ul çaqta – AQŞ komissiäse wäkile bularaq Sovet xakimiätläre belän ğadäti qorallarnı kimetü turında söyläşü bulğan.
Soñıraq ul Mäskäwdäge amerikan missiäse başlığı urınbasarı, annan soñ isä Çexiä başqalası Pragada AQŞ ilçelegendä säyäsi häm iqtisadi eşlär kiñäşçese bulıp eşlägän. Xäzergä qadär ul Bolğarstanda ilçe bulıp tordı.
John Beyrle bolğar telen dä, rus telen dä mökämmäl belä. Yaña ilçe bulası bu diplomatnıñ elekke Sovetlar Berlege belän elemtä tarixı küptännän kilä. Anıñ ätice, Joseph Beyrle ikençe dönya suğışı waqıtında AQŞ häm Sovet köçläre yağında suğışqan. Fransiädä ul äsirlekkä töşkän häm 1945 yılda äsirlektän qotılıp Sovet ğaskärläre belän bergä Berlinğa barıp citkän.
Qatı yaralanıp Joseph Beyrle hospitalgä eläkkän, anıñ yanına Marşal Georgiy Zhukov ta kilgän bulğan. Amerikan ğaskärieneñ yazmışı turında işetep Zhukov soñıraq aña dokumentlar yasarğa bulışqan häm Mäskäwdäge AQŞ ilçelegenä ozatqan. Joseph Beyrle 1994 yılda AQŞ häm Rusiä prezidentları Bill Clinton häm Boris Yeltsinnan medal alğan. 10 yıl soñıraq, 2004 yılda Joseph Beyrle wafat bulğan.
Anıñ ulı, John Beyrleneñ isä Mäskäwgä bilgelänüe ike il arasında qatlawlı çorğa turı kilde. Anıñ berençe tapqır Sovetlar Berlegenä kilüe dä – 1983 yılda mönäsäbätlärneñ salqın çorına turı kilgän ide. Waşingtonda anı küplär Rusiä-AQŞ xezmättäşlegeneñ tere misalı itep kürä.
Alay da Rusiä belgeçläre yaña ilçe artıq yomşaq bulır dip kötmi. 2001 yılda Kongressnıñ Helsinki Komissiäse aldında çığış yasap, John Beyrle, Rusiäneñ "idarä itelgän demokratiäsen" kisken täñqitkä totqan ide.