Accessibility links

Saakaşvili ciñüen belderä


Mixail Saakaşvili xatını Sandra Roeflos belän tawış birgännän soñ
Mixail Saakaşvili xatını Sandra Roeflos belän tawış birgännän soñ

Gruziädä ütkän parlament saylawında prezident Mixail Saakaşvili üz partiäseneñ zur küpçelekkä ireşüen äytte. Oppozitsiä räsmi näticäne xärämläşü dip atadı häm yaña saylawlar ütkärergä çaqıra.

Pänceşämbe iğlan itelgän berençel näticälärgä qarağanda, prezident Mixail Saakaşvilineñ Berläşkän milli xäräkäte 60% tawış cıyıp berençe urında bara. Berläşkän oppozitsiä blogı 14% çaması qazanğan.

Mondıy küp tawış cıyğanıbızğa min üzem dä ğäcäpländem, dide Saakaşvili Reuters agentlığına. Älegä tögäl näticälär yuq, läkin Milli xäräkätneñ parlamentta konstitutsion küpçelek alu ixtimalı zur, dip östäde ul.

Andıy küpçelekkä ireşü öçen parlamentta 150 urınnıñ 2/3-sen alırğa kiräk. Deputatlarnıñ yartısı 5% kirtäne ütkän partiälärdän, yartısı - ber mandatlı bülgelärdän saylana.

Elekke tışqı eşlär ministrı, Milli xäräkät wäkile David Bakradze parlamentnıñ yaña räise bulır dip kötelä. Çärşämbe kiçendä exit-poll näticäläre iğlan itelügä ul bolay dide:

"Älbättä, bezneñ reaksiä uñay. Milli xäräkät belän bezneñ köndäşlär arasındağı tawış ayırması xalıqnıñ küpçelege Milli xäräkätne xuplawın kürsätä" dide xakimiättäge partiä wäkile.

Oppozitsiä bu näticäne şunduq kire qaqtı. 9 partiäne berläştergän oppozitsiä blogı citäkçese David Gamkrelidze exit-poll näticäläre çınbarlıqnı çağıldırmıy dide.

"Exit-poll näticäläre barı tik xökümät telägen, xakimiättäge partiä häm Saakaşvili telägen çağıldıra, - dide oppozitsiä citäkçese. - Çınbarlıq isä tämam başqa, çınbarlıqta alar ciñelde".

Çärşämbe kiç tawış birüdän soñ häm pänceşämbe irtäsendä oppozitsiä wäkilläre Tiflis uramına çığıp üzläreneñ ciñüen belderde. Citäkçelär 10 meñnän artıq keşe kilä disä dä, bu san 3-5 meñnän artmadı. Oppozitsiä räsmilärne xärämläşüdä ğayepläde, näticäne köçtän çığarıp yaña saylawlar ütkärergä çaqırdı.

Saylaw komissiäse iğlan itkän berençel näticägä kürä, 5% kirtäne tağın ike partiä ütä: xristian-demokratlar 8%, leyboristlar 6% çaması cıyğan.

Räsmi näticälär comğa könne iğlan iteläçäk.

XS
SM
MD
LG