Хабаровскида “Сабан туе чибәре”нә әзерлек бара

Хабаровскида даими эшләп килгән татар яшьләре клубы әгъзалары ел буена көтеп алынган бу кадерле бәйрәмнең үзәгендә кайный. Алар тырышлыгы белән милли бәйрәмнең эчтәлеге елдан-ел байый, төрләндерелә бара.

“Икенче ел рәттән Хабаровскида “Сабан туе чибәре” бәйгесен уздырабыз”, дип сөйли җирле яшьләр клубы рәисе Галия Зарипова. Аның әйтүенә караганда, әлеге бәйгедә Ерак Көнчыгыш башкаласында яшәүче төрле милләт вәкилләре катнаша ала.

Агымдагы елның “Сабан туе гүзәле” исеменә татар кызы Полина Шакирова, эвен кызы Кристина Исакова, кореялы Людмила Цой, мари кызы Анна Сенюшкина, таҗик кызы Гөлнара Ятимова, украин кызы Мария Мельникова, беларус кызы Василина Шандовалар дәгъва итә.

Бәйге берничә этапта үтәчәк, аның барышында жюри әгъзалары кызларның төс-кыяфәтен генә түгел, сабан туеның тарихи үткәнен, аның йолаларын белүен, аш-суга сәләтләрен дә тикшерәчәк. Йомгаклау тамашасы исә 26 июльдә тәкъдим ителәчәк.

Үткән ял көннәрендә Хабаровскида “Сабан туе чибәре” бәйгесендә катнашучы кызлар өчен татар милли бизәкләрен ясау остаханәсе уздырылды. Интерьер дизайнеры Гөлсирә Аюханова кызларны милли орнамент тарихыннан кызыклы мәгълүмат белән таныштырды.

Ул татар халкының орнамент сәнгате турында, аларның төрле әйберләрне бизәүдә куллану үзенчәлекләре, орнаментларда кулланылган сурәтләр, төсләр турында сөйләде. “Сабан туе чибәре” бәйгесендә катнашучы кызлар татар халык бизәкләрен аера белергә өйрәнде. Һәм аларның һәркайсы берәр орнамент ясады.

Якшәмбе көнне гүзәл затлар өчен Хабаровски буасы янында фотосессия оештырылды.