Accessibility links

Кайнар хәбәр

Сан-Франциско татарлары Сабан туе үткәрде


Сан-Франциско Сабан туена
Сан-Франциско Сабан туена

Узган якшәмбе Сан-Францисконың Coyote Point паркында үткән Сабан туенда Казаннан килгән кунаклар да катнашкан.


Бөтендөнья татар конгрессы башкарма комитеты рәисе Ринат Закиров, Татарстан дәүләт шурасының мәдәният, фән, мәгариф һәм милли мәсьәләләр комитеты башлыгы Рәзил Вәлиев, җырчылар Рөстәм Асаев, Гөлшат Имамиева, баянчы Ринат Вәлиев Сан-Францискога бер көн алдан килеп, җирле татарларның Сабан туе алды кичәсендә катнашкан. Аларга Флориданың Саратога шәһәренә музыка фестиваленә килгән пианочы Асия Корепанова да кушылган.

Бәйрәмгә шулай ук, хәзерге вакытта АКШның Сиэтл шәһәрендә яшәүче мәшһүр композиторыбыз Мәсгүдә Шәмсетдинова уллары Салих һәм Надир белән килгән.

Америка төрек-татар берләшмәсе (ATTA) идәрәсе рәисе Җүнәйт Чапаноглы Азатлыкка хәбәр итүенчә, берләшмә бинасында үткән кичә кунаклар белән танышудан башланып киткән. Аннан соң берләшмәнең мөхтәрәм әгъзасы, заманында аның рәисе булган, мәхәлләдә 40 елдан артык хезмәт куйган, озак еллар зират эшләрен алып барган Таһир Дәүләтшаны хөрмәтләп бүләкләү тантанасы булган.

Ринат Закиров үзенең чыгышында Татар конгрессының эшчәнлеге белән таныштырган, бергәләп эшләү кирәклеген әйтеп, киләчәктә Америка һәм Канада татарларын берләштергән бер зур Америка Татар Берләшмәсен кору мәсьәләсен күтәргән.

Рәзил Вәлиев үз чыгышында күбрәк татар теле, аны саклау һәм үстерү кирәклеге турында сөйләгән, үзенең шигырьләрен укып күрсәткән, Америка татарларына Казаннан алып килгән CD тәлинкәләре һәм видеолар бүләк иткән.

Чәй мәҗлесеннән соң концерт програмы Элисон Рэйд исемле сопрано җырчысы башкаруында "Америка" җыры белән башланып киткән. Сан-Франциско татарларының "Ай былбылым" төркеме "И туган тел" җырын башкарган. Концерт Казан артистлары чыгышлары белән төнгә кадәр дәвам иткән.

Икенче көнгә Казан кунаклары мәхәллә әгъзалары белән бергә Coyote Point паркында үткән Сабан туенда катнашкан. Төрле уеннар, бәйгеләр, җыр-биюләр белән үрелеп барган. Сабан туенда 100дән артык кеше катнашкан.

XS
SM
MD
LG