Самарда татар телен мәктәпләрдә саклап калуга багышланган татар авыллары мәктәп мөдирләре һәм татар теле укытучылары катнашында җыелыш узды. Фикер алышучылар арасында күзгә ташланганы Альбина Мәхмүтова булды. Аның белән әңгәмә кордык.
– Альбина ханым, җыр аша татар телен өйрәтеп буламы? Укучыларыгыз арасында татарлар күпме?
– Минем төркемдә күбесенчә урыс, чуаш, мукшы балалары. Максатым – аларны татар халык җырларын һәм татар композиторларының әсәрләрен башкару биеклегенә күтәрү. Бу инде татар җырына яңа сулыш өрү, яңа аудитория булдыру, дип саныйм.
– Менә Сез урыс, чуаш, мукшы милләтендәге балаларга татар җырларын өйрәтәсез. Җырлар татар сүзләре белән яңгырыймы, әллә урыс сүзләре беләнме?
– Укучыларымны татар сүзләре белән җырлатуга көч куям. Әйтер идем, хәлләреннән килә. Колледжда укыган чуашларның өчтән бер өлеше – Татарстаннан килгәннәр. Алар татар телен яхшы белә. Алар белән мин турыдан-туры татарча аралашам.
– Ә менә Самар урыс балалары татар җырын татар сүзләре белән җырлыймы?
– Җырлыйлар. Аларга ошый. Гомумән, җырлый белгән кешегә тел өйрәнүдә читенлек юк. Тел – үзе үк көй бит ул.
– Җырчылар арасында да Рөстәм Яхин җырларын башкара алучылар бармак белән генә санарлык. Сездә Рөстәм Яхинның әсәрләрен башкарырлык сәләтлеләр бармы?
– Бар. Без хәтта Рөстәм Яхинга багышланган кичә дә уздырдык. Самарда узган җыр бәйгесендә чуаш кызы атаклы композиторыбызның җырын башкарып, беренче урынны алды.
– Сез – колледжда музыка укытучысы. Татар телен пропагандалау вазифагызга керми. Өстәмә мәшәкать үзегезгә ни бирә?
– Телемне пропагандалаудан тәм табам.
– Үзлегегездән программага татар җырларын кертеп, аларны студентларга өйрәтүегезгә колледж мөдире ничек карый?
– Әлегә түзәләр.