Зыянның зуры Чиләбе өлкәсенә килгән булырга мөмкин. Өлкәнең алты муниципалитетындагы, Еманжелинскида 40, Еткульдә 24 (шул исәптән алты бала да), Копейскида 75, Коркинода 31, Южноуральскида 15 (шул исәптән алты бала), Чиләбедә 107 (шул исәптән 15 бала) зыян күрүе турында әйтелә.
Еткуль авылы хакимияте башлыгы Михаил Грецай Азатлык радиосына, балалар мәктәптә түгел, ә өйләрендә зыян күрде, алар тәрәзә пыялалары ватылып җәрәхәтләнде, дип белдерде. Аның сүзләренчә, бу кадәр көчле шартлау дулкыны беркайчан да күзәтелмәгән. Халыкның башта нык курыкканын да белдерде ул.
Шартлау дулкыныннан Чиләбедәге һәм башка шәһәр, авыллардагы биналарга зыян килгән, җимерелгәннәре дә бар, тәрәзә пыялалары коелган. Чиләбенең үзендә бу казадан соң мәктәпләр һәм балалар бакчалары ябылган.
Чиләбедәге цинк заводы метеорит төшкәннән соң
Чиләбе цинк заводы корылмалары зур зыян килгән биналарның берсе.
Русия эчке эшләр министрлыгы зыян күрүчеләрнең 500-ләп булуын хәбәр итә. "Бу сан зыян күрүчеләр турында яңа мәгълүматлар килсә үзгәрергә мөмкин", дип белдерә министрлык матбугат үзәге.
Метеорит калдыклары “Маяк” атом берләшмәсе урнашкан төбәккә төште. Белгечләр, атом калдыклары сакланучы “Маяк”ны кешелек өчен иң куркыныч урыннарның берсе, дип әйтә. Бүген “Маяк”та бер миллиард кюри атом калдыклары саклана. Анда 200-дән артык атом зираты, атом калдыклы су белән тулган чаннар бар.
“Маяк” урнашкан Озерски шәһәре җир астында атомлы сулыкның әкренләп кенә Чиләбегә таба юл алуы турында да белдерелә.
Бүген дөньяның 18 иленнән “Маяк”ка атом калдыклары китерелә. Русия моның өчен 20 миллиард долларны кесәсенә сала. Халык исә яман шеш һәм башка гомерлек авырулардан, тумыштан гариплектән җәфалана.
