Уфада "Ике аккош" фестиваленә йомгак ясалды

16 декабрь 2014

Фестивальдә Чишмә районы җырчысы Айгөл Газиева җиңүче булды

15 декабрь Уфаның "Нур" татар театры бинасында Фәридә Кудашева һәм Бәхти Гайсинның исемнәрен мәңгеләштерү максатыннан беренче тапкыр җырчы һәм баянчылар бәйге-фестивале узды.

Чара Фәридә Кудашева башкаруында "Ике аккош" җырының фонограммасын тыңлау белән башланды:

Һаваларда оча ике аккош,
Еракларга китә моңнары.
Киләчәккә аккош юлы булып
Китсен безнең яшьлек еллары.

Аннан соң сәхнәгә чараны оештыручы Башкортстан татарлары милли-мәдәни мохтарияте рәисе Римма Үтәшева, фестивальнең кураторы һәм бәяләмә төркеме рәисе, Татарстан һәм Башкортстанның халык җырчысы Айдар Галимов һәм федераль милли-мәдәни мохтарият рәисе Илдар Гыйлметдинов күтәрелде. Федераль мохтарият рәисе Фәридә Кудашева һәм Бәхти Гайсинның сәнгатьтә тоткан урыннарын югары бәяләп, аларны барлык дөнья күләмендәге мәшһүр әһелләр дип бәяләде.

Римма Үтәшева бу чарага кадәр 6 декабрь Авыргазыда музыка коралларында уйнаучылар Бәхти Гайсин көйләрен, 29 ноябрь Чишмәдә җырчылар Фәридә Кудашева репертуарындагы җырларны башкарып, бәйге тотуларын искә төшерде. Айдар Галимов бу бәйгенең үзенчәлеге Бәхти Гайсин язган көйләргә Фәридә Кудашева башкарган җырлар буенча булуын әйтеп, төп максатның әлеге ике сандугачның исемнәрен мәңгеләштерү булуын билгеләде. Чишмә һәм Авыргазы районнары җитәкчеләре, башка рәсми кешеләр чыгышы белән кичәнең рәсми өлеше бер сәгать унбиш минутка сузылды. Хәтта Башкортстанның халык шагыйре Марат Кәримовка Кудашева, Гайсиннарга багышлап язылган шигырен укырга да вакыт калмаган булып чыкты.

Аннан соң мәдәни өлеш башланды. Кичәдә Авыргазы һәм Чишмә районнарында узган бәйгеләрдә югары урыннарны алучылар, шулай ук бәяләмә төркеме әгъзалары чыгыш ясады. Чара ахырында җиңүчеләргә бүләкләр тапшырылды. Беренче урынга Чишмә районыннан Айгөл Газиева лаек булды. Шулай ук икенче һәм өченче урыннарны алучылар, Ихласлык, Ышаныч, Омтылыш, Өмет дигән номинацияләрдә җиңүчеләр билгеләнде.